पिंपरी, ता. २९ : ‘सकाळ’ पिंपरी-चिंचवडचा ३२ वा वर्धापन दिन शनिवारी (ता. ३०) आहे. त्यानिमित्त चिंचवड येथील प्रा. रामकृष्ण मोरे प्रेक्षागृहात सायंकाळी साडेपाच ते साडे आठ या वेळेत स्नेहमेळावा आयोजित केला आहे. त्यास वाचकांसह हितचिंतक, विक्रेते, जाहिरातदार यांनी उपस्थित राहावे. मात्र, पुष्पगुच्छ आणू नयेत, असे आवाहन ‘सकाळ’ व्यवस्थापनाने केले आहे.
गावागावांचे मिळून महानगर बनलेले पिंपरी-चिंचवड आज स्मार्ट सिटी, मेट्रो सिटी झाले आहे. शहराचा विस्तार वाढला आहे. लोकसंख्या वाढली आहे. नागरी सुविधांबरोबरच नागरिकांच्या अपेक्षाही वाढल्या आहेत. विविध क्षेत्रांत लौकिक मिळवत आहे. उद्योगांबरोबर कामगार, नोकरदार, ज्येष्ठ, महिला, युवक व बालगोपाळांच्या कलागुणांना वाव मिळत आहे. अशा प्रत्येक क्षेत्रातील व प्रत्येकाच्या मनातील भाव-भावनांना व्यासपीठ मिळवून देणारा एक घटक म्हणजे ‘दै. सकाळ.’ वाचक, विक्रेते, जाहिरातदार आणि हितचिंतकांचे प्रेम व शुभेच्छांच्या पाठबळावर पिंपरी-चिंचवड ‘सकाळ’ आज ३२ वर्षे पूर्ण करत आहे. ३३ व्या वर्षात पदार्पण करताना वाचक आणि हितचिंतकांचा स्नेहमेळावा शनिवारी (ता. ३०) चिंचवड येथील प्रा. रामकृष्ण प्रेक्षागृहाच्या आवारात सायंकाळी साडेपाच ते साडे आठ या वेळेत आयोजित केला आहे. त्यास कला, साहित्य, सांस्कृतिक, क्रीडा, वैद्यकीय, आरोग्य, प्रशासकीय, पोलिस, शिक्षण, सेवा अशा विविध क्षेत्रातील मान्यवरांना प्रेमाचे आणि आग्रहाचे निमंत्रण दिले जात आहे. या निमित्त भेटीगाठींसह कॉफी आणि अल्पोपाहाराचा आस्वादही घेता येणार आहे.