पिंपरी, ता. ४ ः ‘दर्जेदार गझल लेखन शिवधनुष्य पेलण्यासारखे असते. मीना शिंदे या मराठीत दिवान लिहिणाऱ्‍या आद्य महिला गझलकार आहेत. आपल्या लेखनातून त्यांनी प्रयोगशीलता जपली आहे.’ असे गौरवोद्‍गार आद्य मराठी गझल संशोधक प्रा. डॉ. अविनाश सांगोलेकर यांनी काढले. शब्दधन काव्यमंच तर्फे ‘चला जाऊ या ज्येष्ठ साहित्यिकांच्या घरी.’ हा उपक्रम आयोजित केला होता. यावेळी सांगोलेकर बोलत होते. तसेच ज्येष्ठ गझलकारा मीना शिंदे यांना सन्मानित करण्यात आले. सन्मानचिन्ह, ग्रंथ, शाल आणि श्रीफळ असे सत्काराचे स्वरूप होते.
‘साहित्यिक येता घरा, तोचि दिवाळी, दसरा’ अशी भावना माझ्या मनात आहे. सुमारे चोवीस वर्षांपासून शब्दधन या संस्थेशी माझे ऋणानुबंध आहेत. असे मनोगत सत्काराला उत्तर देताना मीना शिंदे यांनी व्यक्त केले. शब्दधन काव्यमंचचे अध्यक्ष सुरेश कंक, अशोकमहाराज गोरे, संजय शिंदे यांनी या कार्यक्रमाचे संयोजन केले. तानाजी एकोंडे यांनी बहारदार सूत्रसंचालन केले. जयश्री गुमास्ते यांनी आभार मानले.