पिंपरी, ता. ४ ः द ॲकॅडमी स्कूलने विद्यार्थ्यांसाठी इंडिया इंटरनॅशनल मूव्हमेंट टू युनायटेड नेशन्स (आयआयएमयूएन) ही परिषद आयोजित केली होती. त्याला २०० हून अधिक प्रतिनिधी उपस्थित होते. या परिषदेला लेखक अक्षत गुप्ता व प्रख्यात पारुल विद्यापीठातील प्राध्यापक डॉ. पवन द्विवेदी, यांची प्रमुख उपस्थिती होती.
या परिषदेत विद्यार्थ्यांना उत्तम श्रोता होण्यासाठी काय कौशल्ये आवश्यक आहेत, तसेच आपले उच्चार सुधारण्यासाठी काय करावे, यासाठी काही उपक्रम राबवण्यात आले. लोकप्रतिनिधी कायदा १९५१, इंडियन प्रीमियर लीग मेगा लिलाव, ड्रग्ज व गुन्ह्यावरील संयुक्त राष्ट्रांचे कार्यालय आणि रामायणाच्या संकट समितीवर लोकसभेतील चर्चा अशा अनेक विषयांवर चर्चादेखील या परिषदेत झाल्या.
द ॲकॅडमी स्कूलच्या प्राचार्य इंदिरा रामचंद्रन म्हणाल्या,‘‘या परिषदेतील विविध चर्चा व वादविवाद सत्रे यामुळे विद्यार्थ्यांमध्ये एक व्यापक दृष्टिकोन निर्माण झाला. या परिषदेमुळे विद्यार्थ्यांसाठी संधींची नवीन दारे खुली झाली आहेत.’’