पिंपरी, ता. ६ ः संच मान्यतेसाठी विद्यार्थ्यांचे आधार अपडेट करणे आवश्यक आहे. ते न केल्यास नव्याने टप्पा अनुदानावर येणाऱ्या शाळा, महाविद्यालयांना वेतन अनुदानाला मुकावे लागणार असल्याचे शिक्षण विभागाने स्पष्ट केले आहे. परंतु, आधार अपडेट करताना तांत्रिक अडचणींचा सामना करावा लागत असल्याने त्यासाठी वेतन थांबवू नये, अशी मागणी शिक्षक व मुख्याध्यापकांकडून करण्यात आली आहे.
राज्य शासनातर्फे २०, ४०, ६० टक्के टप्पा अनुदानावर आलेल्या शाळांच्या संच मान्यतेची प्रक्रिया पूर्ण केली जात आहे. नव्याने २० टक्के टप्पा अनुदानावर आलेल्या शाळांमधील शिक्षकांना दिल्या जाणाऱ्या वेतनासाठी विद्यार्थी आधार अपडेटची अट घातली आहे. सध्या २०२३-२४ ची संच मान्यता पेंडिंग आहे. दिलेल्‍या मुदतीत विद्यार्थ्यांचे आधार अपडेट झाले नाही तर वेतन अनुदान थांबवले जाईल, अशी शिक्षण विभागाने भूमिका घेतली.

‘‘अनेक वर्षांपासून वेतनाच्या प्रतीक्षेत असलेल्या शिक्षकांना टप्पा अनुदान मिळण्यास सुरवात होणार आहे. तसेच संबंधित शिक्षकांना अतिरिक्त ठरवणे योग्य नाही. आधार अपडेट करण्यास शिक्षण विभागाने मुदतवाढ द्यावी. शिक्षकांचे वेतन थांबवू नये.’’
- हिंदुराव जाधव, अध्यक्ष, पश्‍चिम महाराष्ट्र माध्यमिक व उच्च माध्यमिक मुख्याध्यापक संघ

‘‘२०, ४०, ६० टक्के टप्पा अनुदानावर आलेल्या शाळांमधील शिक्षकांचे वेतन थांबवणे अवघड आहे. विद्यार्थ्यांचे आधार अपडेट करणे आवश्‍यक आहे. पण ते करण्यासाठी शिक्षकांना मर्यादा येत आहेत.’’
-महेंद्र गणपुले, प्रवक्ता, मुख्‍याध्यापक संघ