पिंपरी, ता. ३ ः दुचाकी चोरणाऱ्या तीन सराईत चोरट्यांना चाकण पोलिसांनी अटक केली आहे. त्‍यांच्‍याकडून बारा लाख रुपये किमतीच्या एकूण बारा मोटारी, तीन ऑटो रिक्षा जप्‍त केल्‍या आहेत. पिंपरी-चिंचवड आणि परजिल्ह्यातून चोरी केलेली वाहने पोलिसांनी ताब्यात घेतली आहेत.
राहुल शिवाजी राठोड, फारुक अन्सर पठाण व विशाल दिलीप करपते अशी अटक करण्यात आलेल्या आरोपींची नावे आहेत.
चाकण पोलिस ठाण्याचे वरिष्ठ पोलिस निरीक्षक प्रमोद वाघ, पोलिस निरीक्षक (गुन्हे) नाथा घार्गे यांच्‍या मार्गदर्शनाखाली तपास पथकाचे सहायक पोलिस निरिक्षक प्रसन्न जराड, गणपत धायगुडे व तपास पथकातील पोलिस अंमलदार आदींनी मिळून ही कारवाई केली.
चाकण पोलिसांनी दिलेल्‍या माहितीनुसार आरोपी वाहन घेऊन जात असल्‍याची माहिती चाकण पोलिसांना मिळाली होती. त्यांची चौकशी दरम्यान त्यांनी गुन्हा केल्याची कबुली दिली. या आरोपींनी चाकण, आळंदी, म्हाळुंगे एमआयडीसी, भोसरी, खोपोली, लोणावळा, सोलापूर, औरंगाबाद व अकोला जिल्ह्यातील पोलिस ठाणे येथून दुचाकी तसेच अॅटो रिक्षा चोरी केली असल्याची कबुली दिली. बारा लाख रुपये किमतीच्या बारा दुचाकी आणि तीन अॅटो रिक्षा जप्त करण्यात आल्या आहेत, अशी माहिती परिमंडळ तीनचे पोलिस उपायुक्त डॉ. शिवाजी पवार यांनी दिली.