पिंपरी, ता. ३ : ४५ कोटींच्या मेफेड्रॉन या अमली पदार्थाच्या गुन्ह्यात पिंपरी-चिंचवड पोलिस दलातील फौजदार विकास शेळके याला अटक केल्याने खळबळ उडाली. दरम्यान, एवढ्या मोठ्या प्रमाणात मेफेड्रॉन कुठून आले ? याचा शोध सुरु असून ज्या वाहनातून मेफेड्रॉनचे पोते रस्त्यावर पडले, त्या वाहनाच्या शोधासाठी पिंपरी-चिंचवड पोलिसांची धावाधाव सुरु आहे. सीसीटीव्ही फुटेज तपासण्यासह इतरही माहिती घेतली जात आहे. दरम्यान, अटकेत असलेल्या फौजदार शेळके याच्यावर निलंबन कारवाई करण्यासाठी अहवाल पाठविण्यात आल्याचेही अधिकाऱ्यांनी सांगितले.
पिंपळे निलख येथे शुक्रवारी (ता.१) पहाटे सांगवी पोलिसांनी आरोपी नमामी शंकर झा (वय ३२, रा. निगडी) याला ताब्यात घेत त्याच्याकडून दोन कोटी रुपये किमतीचे मेफेड्रॉन जप्त केले. त्याच्याकडे केलेल्या चौकशीत निगडी पोलिस ठाण्यातील फौजदार विकास शेळके याचे नाव समोर आल्याने त्यालाही पोलिसांनी अटक केली. त्यांच्याकडून एकूण ४४ कोटी ७९ लाख ८० हजार रूपये किमतीचे मेफेड्रॉन ड्रग्ज जप्त केले आहे.
२६ फेब्रुवारीला एका मोटारचालकाला निगडी परिसरातील रस्त्यावर एका वाहनातून पोते पडल्याचे दिसले. त्याने ते पोते निगडी भक्ती-शक्ती चौकात नाकाबंदीवरील पोलिस अंमलदार सुधीर ढवळे व अनिल चव्हाण यांच्याकडे दिले. याबाबत कर्मचाऱ्यांनी शेळके याला माहिती दिली. त्यानंतर, शेळके याने झा याला बोलावून घेत मेफेड्रॉन विक्रीसाठी ग्राहक पाहण्यास सांगितले. त्यानंतर, हा सर्व प्रकार समोर आला. दरम्यान, ज्या ट्रकमधून मेफेड्रॉनचे पोते पडल्याचे दिसत आहे. त्या ट्रकचा सीसीटीव्हीच्या आधारे शोध सुरु असून तो ट्रक शोधण्याचे आव्हान पोलिसांसमोर आहे.