पिंपरी ः मावळ लोकसभा मतदारसंघातील पिंपरी विधानसभा कार्यालयामार्फत निवडणूक आदर्श आचारसंहिता अंमलबजावणीसाठी विविध भरारी पथके आणि निगडी व दापोडी येथे स्थिर पथके नियुक्त केली आहेत. बुधवार (ता. १) संध्याकाळी पाचच्या सुमारास निगडीतील स्थिर सर्वेक्षण पथकाने एका मोटारीची (क्रमांक एमएच १२ युव्ही ५००५) तपासणी केली. त्यामध्ये २९ लाख पन्नास हजार रुपये आढळून आले. ही रक्कम दीपक रवींद्र वाणी यांची असल्याचे तपासणीत समजले. रक्कम जप्त करून प्राप्तिकर उपआयुक्त यांच्याकडे सुपूर्त करण्यात आली आहे. याचा सविस्तर अहवाल मावळ मतदारसंघ निवडणूक निर्णय अधिकाऱ्यांना दिला असल्याचे निवडणूक विभागाने कळविले आहे.