पिंपरी, ता. २८ : लग्‍नात हुंडा न दिल्याने तसेच कामाला जात नाही म्हणून सासरच्या मंडळींनी केलेल्‍या छळाला कंटाळून विवाहितेने राहत्या घरी गळफास घेऊन आत्‍महत्‍या केली. पिंपळे सौदागर येथील झिंजुर्डे मळा येथे ही घटना घडली.
काजल रवींद्र वाघमारे (वय २२, रा. झिंजुर्डे मळा, पिंपळे सौदागर) असे आत्‍महत्‍या केलेल्‍या विवाहितेचे नाव आहे. याप्रकरणी त्यांची आई जिजाबाई परमेश्‍वर कांबळे (वय ४३, रा. वैशालीनगर, बाभळगाव, ता. जि. लातूर) यांनी सांगवी पोलिस ठाण्‍यात फिर्याद दिली आहे. त्यानुसार, पोलिसांनी रवींद्र गोपाळ वाघमारे, बेबन गोपाळ वाघमारे आणि गोपाळ वाघमारे (सर्व रा. माटेगडी, ता. निलंगा, जि. लातूर) यांच्यावर गुन्‍हा दाखल केला आहे. फिर्यादी यांची मुलगी काजल परमेश्वर कांबळे (लग्‍नानंतरचे नाव काजल रवींद्र वाघमारे) यांना त्यांचा पती रवींद्र, सासू बेबन तसेच सासरा गोपाळ यांनी आपापसांत संगनमत करून घरगुती कारणावरून वेळोवेळी मारहाण, शिवीगाळ, दमदाटी केली. मानसिक व शारीरिक त्रास देत त्यांना आत्महत्या करण्यास प्रवृत्त केले.