पिंपरी, ता. २७ : पादचारी महिलांच्या गळ्यातील हिसकावलेले दागिने विकण्यासाठी सासूसोबत आलेल्या एका सराईत इराणी चोरट्याला पिंपरी-चिंचवड पोलिसांच्या गुन्हे शाखेच्या युनिट दोनच्या पथकाने अटक केली. त्याच्याकडून नऊ लाख रुपये किमतीचे दागिने जप्त करण्यात आले.
सादिक शमल खान इराणी (वय ३४, रा. श्रीरामपूर, जि. अहमदनगर) आणि नर्गीस जाफर इराणी (रा. इराणी वस्ती, शिवाजीनगर, पुणे) अशी अटक केलेल्या आरोपींची नावे आहेत. सोनसाखळी चोरी करणारा एक इराणी गुन्हेगार निगडी परिसरात संशयितरीत्या फिरत असल्याची माहिती पोलिसांना मिळाली. त्यावरून पोलिसांच्या पथकाने ट्रान्सपोर्टनगरमधून सादिक इराणी आणि त्याच्या सासूला ताब्यात घेतले. त्याच्याकडील दुचाकी देखील चोरीची असल्याचे समोर आले. त्याच्यावर सोनसाखळी चोरी, फसवणूक आणि इतर असे एकूण तब्बल १९ गुन्हे दाखल आहेत. सादिक हा अहमदनगर येथे राहत असून चोरी करण्यासाठी तो पुणे, पिंपरी-चिंचवड शहरात येत होता. एका मित्रासोबत तो चोऱ्या करत असे. चोरीचे दागिने विकण्यासाठी सादिक हा त्याच्या सासूला घेऊन निगडी परिसरात आला होता. तेथे फिरत असतानाच पोलिसांनी त्याला ताब्यात घेतले.