पिंपरी : कन्स्ट्रक्शन कंपनीत गुंतवणूक करत २९ टक्के परतावा मिळवून देण्याचे आमिष दाखवत व्यावसायिक महिलेची २५ लाख रुपयांची फसवणूक करण्यात आली. हा प्रकार हिंजवडी व रावेत येथे घडला. याप्रकरणी चिखलीतील नेवाळेवस्ती येथील ३८ वर्षीय महिलेने चिखली पोलिस ठाण्यात फिर्याद दिली आहे. त्यानुसार वैभव सुनील देशपांडे (वय २८ रा. सुखवाणी कोलोरोनिक सोसायटी, रावेत) याच्यावर गुन्हा दाखल झाला आहे. फिर्यादी यांना आरोपीने नोबल कन्स्ट्रक्शन या कंपनीत पैसे गुंतवल्यास २९ टक्के परतावा मिळेल असे सांगितले. त्यानुसार फिर्यादी यांनी सुरुवातीला एक लाख २५ हजार रुपये गुंतवले. त्याचे एक महिन्यात फिर्यादीला एक लाख ६१ हजार २५० रुपये दिले. फिर्यादी यांचा विश्वास संपादन होताच फिर्यादीला आरोपीने वेगवेगळ्या बँक खात्यावर २५ लाख ८० हजार रुपये पाठवण्यास सांगितले. आरोपीने ते पैसे न गुंतवता त्याचा स्वतः वापर केला. फिर्यादी यांनी पैशांची मागणी करताच आरोपीने खोटे बँकेचे एनईएफटी व आरटीजीएस दाखवून फिर्यादीची २५ लाख ८० हजार रुपयांची फसवणूक केली.

जखमी महिलेला रुग्णालयात घेऊन जाणाऱ्या टेंपोचालकाला मारहाण
भोसरी : टेम्पोची धडक बसल्याने दुचाकीस्वार महिला जखमी झाली. त्या जखमी महिलेला टेम्पोचालक उपचारासाठी रुग्णालयात घेऊन जात असताना महिलेच्या ओळखीच्या तिघांनी टेम्पो चालकाला मारहाण करून टेम्पोची तोडफोड केली. ही घटना एमआयडीसी भोसरी येथे घडली. याप्रकरणी तानाजी कुशाभाऊ कडाळे (रा. भगतवस्ती, भोसरी) यांनी एमआयडीसी भोसरी पोलिस ठाण्यात फिर्याद दिली आहे. त्यानुसार पोलिसांनी शिवम रामसुमेर वर्मा (वय २०), कृष्णा अजय आल्हाट (वय २०), धनंजय अरुण काळे (वय २१, तिघेही रा. भोसरी) यांच्यावर गुन्हा दाखल केला आहे. फिर्यादी हे त्यांचा टेम्पो घेऊन एमआयडीसी भोसरी येथून जात होते. दरम्यान डाव्या बाजूने अचानक दुचाकीस्वार महिला टेम्पोसमोर आल्याने टेम्पोची दुचाकीला धडक बसली. त्यात महिला जखमी झाली. फिर्यादी हे जखमी महिलेला उपचारासाठी रुग्णालयात घेऊन जात होते. त्यावेळी जखमी महिलेच्या ओळखीच्या व्यक्तींनी फिर्यादी यांना लाथाबुक्क्यांनी बेदम मारहाण केली. तसेच त्यांच्या टेम्पोची काच फोडून आरोपी पसार झाले.

कुदळवाडीत १४ किलो गांजा जप्त
चिखली : गांजा बाळगणाऱ्या दोघांना पोलिसांच्या गुन्हे शाखेच्या अमली पदार्थ विरोधी पथकाने कुदळवाडी येथे अटक केली. त्यांच्याकडून १४ किलो ७६ ग्रॅम गांजा जप्त केला. अजरुद्दीन मुनीर शहा (वय ४०, रा. चिखली), हमीदउल्ला नसीमउल्ला खान (वय २४, रा. जाधववाडी, चिखली) यांना अटक केली असून, रोहित शर्मा (रा. चिखली) याच्यावर गुन्हा दाखल झाला आहे. कुदळवाडी येथे दोघेजण गांजा घेऊन आले असल्याची माहिती पथकाला मिळाली. त्यानुसार पोलिसांनी सापळा रचून अजरुद्दीन व हमीदउल्ला यांना ताब्यात घेतले. त्यांच्याकडून गांजासह दुचाकी, तीन मोबाईल फोन असा एकूण आठ लाख ९३ हजार ८०० रुपयांचा मुद्देमाल पोलिसांनी जप्त केला आहे. हा गांजा आरोपी रोहित शर्मा याच्याकडून आणल्याचे आरोपींनी सांगितल्याने शर्मा याच्यावरही गुन्हा दाखल करण्यात आला आहे.

जॉबच्या बहाण्याने महिलेची फसवणूक
रावेत : पार्ट टाइम जॉबच्या बहाण्याने एका महिलेची ११ लाख १३ हजार रुपयांची फसवणूक करण्यात आली. ही घटना शिंदेवस्ती, रावेत येथे घडली. याप्रकरणी रावेतमधील शिंदे वस्ती येथील ३३ वर्षीय महिलेने रावेत पोलिस ठाण्यात फिर्याद दिली आहे. त्यानुसार अज्ञात आरोपीवर गुन्हा दाखल झाला आहे. आरोपी महिलेने फिर्यादी महिलेशी संपर्क साधून ती ‘डीडीबी वर्ल्ड वाईल्ड मीडिया’ कंपनीची एचआर असल्याचे सांगितले. फिर्यादीस गुगल मॅपवर रिव्ह्यू देऊन पार्ट टाइम पैसे मिळवून देण्याच्या बहाण्याने त्यांना वेगवेगळे टास्क दिले. फिर्यादीस वेगवेगळ्या लिंक पाठवून त्यांना टेलिग्राम ग्रुपला जॉईन केले. फिर्यादीकडून वेगवेगळ्या बँक खात्यांवर पैसे जमा करण्यास सांगून फिर्यादीची एकूण ११ लाख १३ हजार रुपयांची फसवणूक केली. रावेत पोलिस अधिक तपास करीत आहेत.
----------------