पीतांबर लोहार ः सकाळ वृत्तसेवा
पिंपरी, ता. १० ः कोरोना संसर्गातून धडा घेत महापालिकेने आरोग्य व वैद्यकीय सेवासुविधा सक्षम करण्यावर भर दिला आहे. दवाखान्यांची संख्या वाढवून रुग्णालयांतील खाटांची संख्या वाढवली आहे. यामध्ये अतिदक्षता विभागासह (आयसीयू, एनआयसीयू) वैद्यकीय, शस्रक्रिया, बालरोग, अस्थी, नाक-कान-घसा, दंतचिकित्सा, डायलिसिस, एक्स रे आदी सुविधांचा समावेश आहे. खाटांची संख्या ९५५ वरून एक हजार ५२१ वर गेली आहे.
पिंपरी-चिंचवड शहरात १० मार्च २०२० रोजी कोरोना संसर्गाचा पहिला रुग्ण आढळला आणि महापालिकेची वैद्यकीय यंत्रणा सजग झाली. या घटनेला सोमवारी (ता. १०) पाच वर्ष पूर्ण झाली. पण, त्यावेळची महापालिकेची वैद्यकीय व आरोग्य सुविधा आणि आताची स्थिती यामध्ये खूप मोठा फरक झालेला असतो. ‘कोरोना’तून धडा घेत महापालिकेने स्वतःच्या वैद्यकीय सुविधा वाढविण्यावर भर दिला आणि त्यातून पाच नवीन रुग्णालयांची निर्मिती, स्वतंत्र नेत्र रुग्णालयाची निर्मिती, यशवंतराव चव्हाण स्मृती रुग्णालयातील (वायसीएम) सुविधा व मनुष्यबळात वाढ केली. कारण, त्यावेळी केवळ वायसीएम हेच मल्टिस्पेशालिटी रुग्णालय होते. आता पाच रुग्णालयांची भर पडली आहे. आणखी तीन रुग्णालये दृष्टिक्षेपात आहेत. त्यामुळे रुग्णांना शहरात चांगल्या वैद्यकीय सुविधा मिळू लागल्या आहेत. शिवाय, सार्वजनिक ठिकाणी थुंकणाऱ्यांपासून उघड्यावर कचरा टाकणाऱ्यांपर्यंत महापालिका दंडात्मक कारवाई करत आहे. रस्ते, सार्वजनिक स्वच्छतागृह व सार्वजनिक ठिकाणांची काळजीपूर्वक नियमित साफसफाई केली जात आहे. त्यामुळे वैद्यकीय बरोबरच आरोग्य सुविधा सक्षम केल्या आहेत.

रुग्णालयनिहाय वैद्यकीय सुविधा
- वायसीएम व नवीन थेरगाव रुग्णालय ः आयसीयू, एनआयसीयू, वैद्यकीय, शस्रक्रिया, स्रीरोग व प्रसूती, बालरोग, अस्थिरोग निदान, नाक-कान-घसा, दंतचिकित्सा, डायलिसिस, एक्स रे, सीटी स्कॅम, एमआयआर, स्कीन
- नवीन भोसरी व नवीन आकुर्डी रुग्णालय ः आयसीयू, एनआयसीयू, वैद्यकीय, शस्रक्रिया, स्रीरोग व प्रसूती, बालरोग, नाक-कान-घसा, दंतचिकित्सा, एक्स रे
- नवीन जिजामाता रुग्णालय ः आयसीयू, एनआयसीयू, वैद्यकीय, शस्रक्रिया, स्रीरोग व प्रसूती, बालरोग, अस्थिरोग निदान, नाक-कान-घसा, दंतचिकित्सा, एक्स रे
- तालेरा रुग्णालय चिंचवड ः वैद्यकीय, स्रीरोग व प्रसूती, बालरोग, दंतचिकित्सा, एक्स रे
- यमुनानगर रुग्णालय ः वैद्यकीय, स्रीरोग व प्रसूती आणि बालरोग
- सांगवी रुग्णालय ः स्रीरोग व प्रसूती आणि बालरोग
- नेत्र रुग्णालय नेहरूनगर ः नेत्ररोग निदान, चिकित्सा व शस्रक्रिया

भविष्यातील नियोजन
- मोशी येथील ७५० खाटांच्या क्षमतेचे मल्टिस्पेशालिटी रुग्णालय प्रस्तावित
- चिंचवड येथील २०० खाटांच्या क्षमतेचे नवीन तालेरा रुग्णालय सुरू होणार
- चिंचवड येथील जुन्या तालेरा रुग्णालयात बर्नवॉर्ड करण्याचे नियोजन
- थेरगाव येथील नवीन थेरगाव रुग्णालयाशेजारी कर्करोग निदान रुग्णालय अंतिम टप्प्यात
- महापालिकेचे ३० दवाखाने असून, शंभर जिजाऊ क्लिनिक आणि प्रत्येक प्रभागात आपला दवाखाना उपक्रम राबविण्याचे नियोजन

महापालिका रुग्णालयांतील खाटा
रुग्णालय / डिसेंबर २०२० पर्यंत / जानेवारी २०२१ नंतर
नवीन थेरगाव / १६ / ३४०
नवीन भोसरी / ७० / १००
नवीन जिजामाता पिंपरी / १२ / १३०
नवीन आकुर्डी / २६ / १२०
तालेरा चिंचवड / ४५ / ४५
सांगवी रुग्णालय / २० / २०
यमुनानगर रुग्णालय / २० / २०
वायसीएम पिंपरी / ७५० / ७५०
एकूण / ९५५ / १५२१

सुविधांनिहाय खाटांची संख्या
रुग्णालय / आयसीयू / एनआयसीयू/ डायलिसिस
नवीन थेरगाव / २६ / १४ / १०
नवीन भोसरी / १० / ६ / ५
नवीन जिजामाता / १४ / १० / ५
नवीन आकुर्डी / १२ / १२ / ५
तालेरा चिंचवड / ४५ / ४५ / ५
वायसीएम पिंपरी / ४८ / १८ / १०
एकूण / ११० / ६० / ४०

‘‘कोरोनानंतर नवीन पाच रुग्णालये सुरू केली आहेत. वायसीएमबरोबरच तेही मल्टिस्पेशलिटी सुविधांची आहेत. नवीन तालेरा रुग्णालय मिळून १७२१ बेडची सुविधा आहे. त्यात आयसीयू, एनआयसीयू, डायलिसिस अशा पायाभूत वैद्यकीय सुविधा वाढल्या आहेत. नेत्र रुग्णालय स्वतंत्र आहे. बर्न व कॅन्सर हॉस्पिटल अंतिम टप्प्यात आहेत. मोशीत मल्टिस्पेशालिटी रुग्णालय प्रस्तावित आहे.
- डॉ. लक्ष्मण गोफणे, मुख्य आरोग्य व वैद्यकीय अधिकारी, महापालिका
--