पिंपरी, ता. २५ ः मीरा भाईंदर महापालिका अधिकाऱ्यांच्या शिष्टमंडळाने पिंपरी-चिंचवडला भेट देऊन विविध प्रकल्पांची माहिती घेतली. महापालिकेत येऊन विविध विभागांतील उपक्रम व कार्यपद्धती समजून घेतली. पिंपरी-चिंचवडप्रमाणेच मीरा भाईंदरमध्येही विविध प्रकल्प राबविण्याचा मनोदय शिष्टमंडळातील अधिकाऱ्यांनी व्यक्त केला.
मीरा भाईंदर महापालिका आयुक्त राधाबिनोद शर्मा यांच्यासह अतिरिक्त आयुक्त डॉ. संभाजी पानपट्टे, अतिरिक्त शहर अभियंता दीपक खांबीत, कार्यकारी अभियंता शरद नानेगावकर, अग्निशमन केंद्र अधिकारी प्रकाश बोरडे, सहाय्यक आयुक्त योगेश गुणिजन, स्वप्निल सावंत, प्रकल्प प्रमुख कैलास गिते, घनकचरा व्यवस्थापन तज्ज्ञ अक्षय ढबाले, विनीत चौहान, रोहन घुले, उपआयुक्त कल्पिता पिंपळे, कार्यकारी अभियंता नितीन मुकणे, सहाय्यक संचालक पुरुषोत्तम शिंदे, सहाय्यक आयुक्त नरेंद्र चव्हाण आदींसह विविध विभागातील अधिकाऱ्यांचा शिष्टमंडळात समावेश होता.
रस्ते विकास विभागाच्या जीआयएस प्रणालीद्वारे रस्त्यांचे मोजमाप व इतर विकासकामांची माहिती पथकाने घेतली. उद्यान विभागाच्या १९७ उद्यानांची माहिती व बायोडायव्हर्सिटी पार्क उपक्रमाचे कौतुक केले. समाज विकास विभागाच्या दिव्यांग भवन, वेस्ट टू एनर्जी प्रकल्प, लिनियर गार्डन, कासारवाडी जलःनिसारण प्रकल्प, कचरा व्यवस्थापन प्रकल्प, सायन्स पार्क, पिंपळे गुरव डायनासोर पार्क अशा विविध कार्य पद्धतीची माहिती पथकाने घेतली.

पिंपरी-चिंचवडचे सादरीकरण
पिंपरी-चिंचवड महापालिका शहर अभियंता मकरंद निकम (रोड असिस्टंट ॲन्ड मॅनेजमेंट सिस्टीम), सहाय्यक आयुक्त अविनाश शिंदे (करसंकलन प्रणाली), उपआयुक्त अण्णा बोदडे (बचत गटाच्या माध्यमातून मालमत्ता कर पावती वितरण व झोपडपट्टी भागातून संकलित कर), मुख्य माहिती व तंत्रज्ञान अधिकारी निळकंठ पोमण (संगणक प्रणाली), सहशहर अभियंता बापू गायकवाड (दळण वळण), पर्यावरण विभाग कार्यकारी अभियंता हरविंदरसिंग बन्सल (पर्यावरण, जलःनिसारण आणि वेस्ट टू एनर्जी प्रकल्प), आरोग्य वैद्यकीय अधिकारी डॉ. लक्ष्मण गोफणे (आरोग्य), उपआयुक्त प्रदीप ठेंगल (नागरी सुविधा केंद्र), प्रशासन अधिकारी संगिता बांगर (शिक्षण), सहाय्यक आयुक्त उमेश ढाकणे (उद्यान), उपआयुक्त राजेश आगळे (आकाशचिन्ह व परवाना), सहाय्यक आयुक्त तानाजी नरळे (समाज विकास) यांनी संगणकीय पद्धतीने आपापल्या विभागाच्या कामांचे सादरीकरण केले.
---