पिंपरी, ता. २६ ः ‘बिग बी’ शब्द उच्चारला तरी डोळ्यांसमोर नाव येते प्रसिद्ध अभिनेते अमिताभ बच्चन यांचे. येत्या ११ ऑक्टोबर रोजी त्यांचा ८३ वा वाढदिवस आहे. त्यानिमित्त ‘सकाळ माध्यम समूहा’ने सुप्रसिद्ध गायक सुदेश भोसले यांच्या आवाजात ‘बिग बीं’चे संगीतमय अभीष्टचिंतन करण्यासाठी ‘सुदेश भोसले लाइव्ह’ या विशेष कार्यक्रमाचे आयोजन काळेवाडीतील रागा पॅलेस येथे शुक्रवार, १० ऑक्टोबर रोजी केले आहे.
भारतीय चित्रपटांच्या इतिहासातील प्रभावशाली अभिनेत्यांपैकी एक नाव म्हणजे ज्येष्ठ अभिनेते अमिताभ बच्चन. गेली सहा दशके त्यांनी रसिकांच्या मनावर अधिराज्य गाजवले आहे. दूरचित्रवाणी वाहिनीवरील सूत्रसंवादक अशीही त्यांची ओळख आहे. त्यांच्या विविध चित्रपटांतील भूमिका विशेष गाजल्या आहेत. त्यांच्यावर चित्रित झालेली गाणी आजही सर्व वयोगटांतील रसिकांच्या मनात घर करून आहेत. प्रत्येकजण ती गाणी गुणगुणत असतो. त्या गाण्यांना सुप्रसिद्ध गायक सुदेश भोसले यांच्या आवाजाचा साज लाभणार आहे. त्यामुळे सुरेल स्वरांनी भारून टाकणारा ‘सुदेश भोसले लाइव्ह’ कार्यक्रम पिंपरी-चिंचवडकरांसाठी नक्कीच अविस्मरणीय ठरणार आहे.

कार्यक्रमाविषयी....
- सुप्रसिद्ध गायक सुदेश भोसले यांच्यासमवेत सहगायक मकरंद पाटणकर यांचा सहभाग
- ‘बिग बी’ यांच्या शैलीत गाणारे व संवादफेक करणारे सुदेश भोसले यांचे असंख्य चाहते
- तिकिटांची सोय BookMyShow वर उपलब्ध
- चिंचवड येथील प्रा. रामकृष्ण मोरे प्रेक्षागृहात सकाळी ९.३० ते सायंकाळी ७ दरम्यान तिकीट विक्री
- ‘सकाळ’तर्फे आयोजित कार्यक्रमाचे लोकमान्य मल्टिपर्पज को-ऑप. सोसायटी लि. सहप्रायोजक
- अमिताभ बच्चन यांच्या अजरामर गाण्यांच्या आठवणींना उजाळा मिळणार

हे लक्षात ठेवा
काय? ः सुप्रसिद्ध गायक सुदेश भोसले यांच्या आवाजात ‘बिग बीं’ना वाढदिवसानिमित्त संगीतमय सलामी
कधी? ः शुक्रवार, १० ऑक्टोबर २०२५
केव्हा? ः सायंकाळी ६.३० वाजता
कुठे? ः रागा पॅलेस, काळेवाडी (एम्पायर इस्टेट सोसायटीजवळील संत मदर तेरेसा उड्डाणपुलाजवळ)
---