पिंपरी, ता. ४ : ‘‘चऱ्होली, मोशी, डुडुळगाव, चिखली या भागात मोठ्या प्रमाणावर नागरीकरण होत आहे. या परिसरात स्वस्तात घरे उपलब्ध होत आहेत. त्‍यामुळे नागरिकांची या भागाला मोठी पसंती आहे. निसर्गरम्य वातावरणात वसलेला हा परिसर असून, त्याविषयीची माहिती ‘सकाळ’कडून नागरिकांना उपलब्ध करून दिली आहे. ‘सकाळ’कडून हा एक चांगला आणि नागरिकांसाठी उपयुक्त उपक्रम आहे. त्‍यामुळे नागरिकांना योग्य निर्णय घेणे सोपे होते,’’ असे प्रतिपादन पिंपरी चिंचवड महापालिकेचे माजी महापौर नितीन काळजे यांनी चऱ्होली येथे शनिवारी (ता. ४) केले.
सकाळ माध्यम समूहाच्‍या वतीने सकाळ वास्‍तू एक्‍स्‍पोचे उद्‍घाटन फीत कापून आणि दीपप्रज्वलन करून माजी महापौर काळजे यांच्‍या हस्‍ते झाले. यावेळी ते बोलत होते. या वास्‍तू एक्‍स्‍पोला नागरिकांचा उत्स्फूर्त प्रतिसाद मिळाला. आळंदी-पुणे पालखी मार्गावरील वडमुखवाडी-चऱ्होली येथील चंद्रफूल गार्डन येथे आयोजित एक्‍स्‍पोच्‍या उद्‍घाटन प्रसंगी कल्पदीप ग्रुपचे ॲड. कैलास तोंडे, अनुज तापकीर, जय हिंद ग्रुप अँड बिल्डर्सचे सागर येरंडे, जी. एस. महानगर बँकचे नितीन खोडदे, मातोश्री ग्रुपचे संदीप पठारे, विवेक तापकीर, अनिरुद्ध तापकीर, स्वप्नील साळुंखे, तातेराव मुंडे, माऊली तापकीर, रॉयल कीजचे सोहन सस्ते, भाग्यलक्ष्मी ग्रुपचे स्वप्नील फुगे, केशव ग्रुपचे एन. के. सिंग, द हॉलमार्क बिल्‍डस्‍ट्राँग ग्रुपचे सुनील पंजाबी, मंगलमचे शिवाजी काळे, शिवम कश्यप, अनिरुद्ध तापकीर तसेच अनंत तापकीर आदी उपस्थित होते.
काळजे म्हणाले, ‘‘चऱ्होलीचा परिसर विकसित होत असून, भविष्यात घर घेणाऱ्यांना या भागात चांगल्या संधी उपलब्ध आहेत. ‘सकाळ’ने आयोजित केलेल्या अशा उपक्रमांची गरज आहे.’’

या परिसरात घर घेण्यासाठी अनेक वर्षांपासून माहिती घेत आहे. मात्र ‘सकाळ’च्‍या माध्यमातून आयोजित एक्‍स्‍पोतून एकत्रित माहिती मिळायला मदत झाली. भविष्यात स्वतःसाठी योग्य ठिकाण या परिसरात घर शोधत आहे.
- सोमनाथ मोरे, चिखली

‘मी ‘सकाळ’चा नियमित वाचक आहे. पुण्यात सकाळ वास्‍तू एक्‍स्‍पो घेतला जातो. त्‍या वेळी दरवर्षी मी तिथे जाऊन घरांची माहिती घेत असतो. चऱ्होली परिसरात बहिणीसाठी घर शोधत आहे. या भागात स्वस्त आणि चांगल्या सुविधा असल्याने इथे पसंती देत आहोत.’
- भीमराव मोटे, रावेत

‘मी नवी मुंबई येथे नोकरी करत आहे. मोशी, चऱ्होली या परिसरात घर घेण्यास आम्ही प्राधान्‍य देत आहे. निवृत्तीनंतर इथे राहता येईल. गावालाही लगेच जाता येईल. ‘सकाळ’ने वास्‍तू एक्‍स्‍पो आयोजित केल्‍याचे समजल्‍याने माहिती घेण्यासाठी भेट दिली.
- अर्चना लोखंडे, मंचर

‘चऱ्होली आणि डुडुळगाव या भागात स्‍वस्‍त दरात घरे उपलब्ध आहेत. त्‍याची एकत्रित माहिती घेण्याच्‍या उद्देशाने ‘सकाळ वास्तू एक्‍स्‍पोला भेट दिली. घर खरेदी करण्यासाठी हा भाग योग्य वाटतो. त्‍याची योग्य माहिती मिळाली.
- पूजा कांबळे, आळंदी.

काय? कुठे? कधी? केव्हा?
काय? ः ‘सकाळ’ वास्तू एक्स्पो
कुठे? ः चंद्रफूल गार्डन, आळंदी-पुणे पालखी मार्ग, वडमुखवाडी, चऱ्होली
कधी? ः रविवार (ता. ५ ऑक्टोबर)
केव्हा? ः सकाळ ११ ते रात्री ८
अधिक माहितीसाठी संपर्क ः निशांत ः ९८८१७१८८४०