पिंपरी, दि. १८ : ‘‘घरेलू कामगारांचे प्रश्न सोडवण्यासाठी घरेलू कामगारांचा केंद्रीय कायदा करावा, असे आदेश सर्वोच्च न्यायालयाने केंद्र सरकारला दिले. त्याला पाच महिने उलटून गेले तरी सरकार चालढकल करत आहे. कायदा मंजूर करून घरेलू कामगारांना सुरक्षा द्यावी,’’ अशी मागणी महाराष्ट्र राज्य घरेलू कामगार समन्वय समितीचे अध्यक्ष काशिनाथ नखाते यांनी केली.
जागतिक घरेलू कामगार दिनानिमित्त महाराष्ट्र राज्य घरेलू कामगार समन्वय समिती, कष्टकरी संघर्ष महासंघ, घरेलू कामगार विभाग यांच्याकडून थरमॅक्स चौक येथे मेळावा घेण्यात आला. यावेळी कामगारांना श्रम प्रतिष्ठा पुरस्कार देऊन सन्मान करण्यात आला. कामगारांच्या गुणवंत पाल्यांचा देखील सत्कार करण्यात आला. यावेळी समाज प्रबोधनकार शारदा मुंडे, महिला अध्यक्षा माधुरी जलमुलवार, इंदुबाई वाकचौरे, मुमताज शेख, नंदा जाधव, माया शेटे, महानंदा घळगे, प्रियांका काटे आदी उपस्थित होते.
घरकाम करून कुटुंबाला प्रतिष्ठा मिळवून देणाऱ्या सरस्वती प्रधान, राणी ठोकळ, राधाबाई ताकतोडे, विजया पाटील यांना घरेलू कामगार श्रमप्रतिष्ठा पुरस्कार देण्यात आला. त्याचबरोबर गुणवंत विद्यार्थी म्हणून राणी नायडू, मयुरी उघडे, श्रद्धा वाघोले, रिद्धी खरात, जैनब पठाण, हर्षिता कांबळे या गुणवंत विद्यार्थ्यांचाही सत्कार करण्यात आला.
शारदा मुंडे म्हणाल्या, ‘‘जिजाऊ, सावित्री, रमाई आणि अहिल्या यांची रुपे आज सर्व घरेलू कामगारांमध्ये दिसतात. गुणवंत विद्यार्थ्यांचा आज सन्मान होत असला तरी विद्यार्थ्यांनी आई-वडिलांना विसरू नये, त्यांची सेवा करावी, मुलांच्या शिक्षणासाठी आई-वडिलांनी काबाड कष्ट केलेले विसरू नये.’’
सूत्रसंचालन सरिता इंगळे यांनी केले. आभार अश्विनी मालुसरे यांनी मानले.