उलट्या गतिरोधकाच्या आकाराचा चर
निगडीतील लोकमान्य टिळक रस्ता कुठल्यातरी दुरुस्ती कामासाठी रस्ता खोदला होता. तेथील भला मोठा लांबलचक चर माती टाकून बुजवला होता. मात्र वादळ वाऱ्याने माती उडून गेली. आता तेथे उलट्या गतिरोधकाच्या आकाराचा व तव्यासारखा लांबलचक चर तयार झाला आहे. कदाचित वाहन चालकांनी वाहने वेगात चालवू नयेत यासाठी असे उलटे गतिरोधक बनवले असावेत. मात्र, त्यामुळे अपघात होण्याची शक्यता आहे. याचा संबंधित विभागाचे अधिकारी विचार करताना दिसत नाहीत.
- शिवराम वैद्य, निगडी

भटक्या श्वानांचा सुळसुळाट
प्राधिकरणातील संत तुकाराम बाग येथील रस्त्यावरील भटक्या श्वानांचा सुळसुळाट झाला आहे. चालत्या वाहनांवर धाव घेणे, कोणाला चावणे अशा प्रकारचे उपद्रव नेहमी त्यांच्याकडून होत आहे. त्यामुळे भीतीदायक वातावरणामध्ये सर्व ज्येष्ठ नागरिक तेथे फिरायला जात असतात. तरी कृपया भटक्या श्वानांचा बंदोबस्त करावा.
- साधना सपाटे, प्राधिकरण

कचऱ्याच्या ढिगाऱ्याने दुर्गंधी
जुनी सांगवी येथील अहिल्याबाई होळकर दशविधीचे कार्य करण्यासाठी आलेल्या नागरिकांना कचऱ्याच्या ढिगाऱ्यामुळे दुर्गंधी होत आहे. त्याने नागरिकांचे आरोग्य धोक्यात आहे. मात्र आरोग्य विभागाचे त्याकडे दुर्लक्ष होत आहे.
- मनोज पवार, जुनी सांगवी

गतिरोधक अर्धवट काढल्याने त्रास
पिंपळे निलख येथील वाकड फाटा बीआरटी बस स्थानकाबाहेर साई चौकाकडे जाणाऱ्या मार्गावर अशास्त्रीय पद्धतीने गतिरोधक बनविले होते. धोकादायक असल्याने ते काढून टाकण्यात आले. मात्र, ते पूर्णपणे व्यवस्थित न काढल्याने दुचाकी वाहन चालकांसाठी त्रासदायक ठरत आहे. महापालिकेच्या ‘ड’ क्षेत्रीय कार्यालयाने संबंधित तक्रारीची दखल घ्यावी.
- सनी शिंदे, पिंपळे निलख