पिंपरी, ता. ८ : आज रक्षाबंधन..! भावा बहिणीच्या अतूट नात्याचा सण. या सणाच्या तयारीचा उत्साह शहरात ठिकठिकाणी दिसून आला. राखी खरेदीसाठी महिलांनी केलेली गर्दी, भेटवस्तू खरेदी करण्यासाठी कापड बाजार, इलेक्ट्रिक दुकाने यासोबतच सराफा बाजारात झालेली गर्दी यामुळे शुक्रवारी (ता.८) बाजारपेठांमध्ये मोठी गजबज दिसून आली.

अनेकांनी आपल्या आवडीच्या मिठाईच्या आगाऊ ऑर्डर देणे पसंत केले. राखीपौर्णिमा कुठे साजरी करायची, याचे नियोजन एक दिवस आधीच कुटुंबीयांकडून केले जात होते. शनिवार-रविवार जोडून सुट्टी आल्याने फिरायला जाण्याचेही बेत केले जात होते.
श्रावण महिन्याला सणांचा राजा म्हटले जाते. नागपंचमी, मंगळागौर, कृष्णजन्माष्टमी, राखीपौर्णिमा अशा अनेक सणांमुळे या महिन्यात एक वेगळेच चैतन्य अनुभवायला मिळते. त्यातच राखीपौर्णिमा हा माहेरवाशिनींसाठी खास सण. या निमित्त बहीण माहेरी येऊन भावाला राखी बांधते. तर, काही ठिकाणी भावाने बहिणीकडे जाण्याची पद्धत आहे. त्यामुळे शहरातून बाहेरगावी जाणाऱ्या गाड्यांना गुरुवारपासूनच (ता.७) गर्दी दिसून आली. जोडून सुट्ट्या आल्याने अनेकांनी सहकुटूंब आपल्या गावी जाण्याचा बेत आखला होता.

दुकाने, मॉलमध्ये गजबज
सध्याच्या धावपळीच्या जीवनामुळे अनेकदा सणासाठी आवश्‍यक वस्तूंची खरेदी ऑनलाइनच केली जाते. मात्र, तरीही बाजारपेठांमध्ये जाऊन खरेदी करणाची हौसही कायम आहे. त्यामुळे राखी खरेदीसाठी दुकाने व सुपर मार्केटमध्ये महिलांनी मोठी गर्दी केली होती. तर सराफाच्या दुकानात जाऊन चांदीची राखी खरेदी करतानाही महिला दिसून आल्या.

ाया वस्तूंची खरेदी
राखी पौर्णिमेच्या दिवशी सकाळी होणारी गडबड टाळण्यासाठी एक दिवस आधीच मिठाईची खरेदी करण्यात आली. राखी पौर्णिमेला आपल्या भावा बहिणीला भेट म्हणून कपडे, घड्याळ, स्मार्ट फोन, इअरफोन, दागिने, इमिटेशन ज्वेलरी, स्मार्ट वॉच यांचीही खरेदी करण्यासाठी बाजारात मोठी गर्दी दिसून आली.