पिंपरी, ता. १४ ः औद्योगिक क्षेत्रात सुरक्षित वातावरण निर्माण व्हावे, कायदा-सुव्यवस्था कायम राहावी, यासाठी चाकण व महाळुंगे एमआयडीसी ठाण्यांचे विभाजन करून दोन स्वतंत्र पोलिस ठाणे आणि औद्योगिक क्षेत्रासाठी स्वतंत्र परिमंडळ निर्माण करण्याचे पिंपरी चिंचवड पोलिस आयुक्तालयाकडून प्रस्तावित आहे.
पुणे शहर व ग्रामीण हद्दीतील पोलिस ठाणे मिळून १५ ऑगस्ट २०१८ रोजी पिंपरी चिंचवड पोलिस आयुक्तालय अस्तित्वात आले. टप्प्याटप्याने नवीन पोलिस ठाण्यांची निर्मिती झाली. त्यामध्ये महाळुंगे एमआयडीसी, शिरगाव, रावेत, बावधन, काळेवाडी, दापोडी, संत तुकारामनगर, सायबर आदी ठाण्यांचा समावेश आहे. त्यामुळे पोलिस ठाण्यांची संख्या २३ वर पोहोचली आहे. अधिकारी, कर्मचाऱ्यांची संख्याही वाढली आहे. सायबर गुन्हे उघडकीस आणण्यावर अधिक भर दिला आहे. आता पोलिस आयुक्तालयाने औद्योगिकनगरी पिंपरी चिंचवडसह चाकण औद्योगिक क्षेत्रातील सुरक्षिततेवर लक्ष केंद्रित केले आहे. खंडणी उकळणे, उद्योजकांना त्रास देणे, लूटमार, माथाडींचा प्रश्न असे प्रकार रोखण्यासाठी वेळोवेळी उद्योजकांसमवेत बैठकी घेऊन अडचणी जाणून घेतल्या जात आहेत. आता औद्योगिक क्षेत्रात पोलिस ठाण्यांची संख्या वाढविण्याचे नियोजन आहे. त्याबाबतचा प्रस्ताव आयुक्तालयाने शासनाकडे सादर केला आहे.

सायबर गुन्हे रोखण्याकडे कल
स्वतंत्र सायबर पोलिस ठाणे स्थापन झाल्यानंतर सायबर गुन्ह्यांच्या तपासाला अधिक वेग आला आहे. तज्ज्ञ अधिकारी, कर्मचाऱ्यांची संख्या वाढली आहे. सायबर गुन्हे रोखण्यासह व दाखल गुन्हे उघडकीस आणण्यासाठी योग्य नियोजन केले जात असल्याचे दिसते. कारण, मोठे गुन्हे उघडकीस आणून सायबर पोलिसांनी देशाच्या विविध भागांतून आरोपींना जेरबंद केले आहे.

मुख्यालयाला जागेची प्रतीक्षा
आयुक्तालय स्थापन झाल्यानंतर सुरुवातीला ऑटो क्लस्टर येथून आयुक्तालयाचे स्वतंत्र कामकाज सुरू झाले. त्यानंतर चिंचवडमधील प्रेमलोक पार्कमधील महापालिकेची महात्मा फुले शाळेची इमारत पोलिस आयुक्तालयासाठी देण्यात आली. सध्याही येथूनच कामकाज सुरू आहे. दरम्यान, काही महिन्यांपूर्वीच चिखली- जाधववाडी येथील जागा आयुक्तालयासाठी उपलब्ध झाली असून येथे सहा मजली इमारतीचे कामही सुरू झाले आहे. मात्र, मुख्यालयासाठी अद्यापही जागा ताब्यात मिळालेली नाही. सध्या निगडीतील अंकुश बोऱ्हाडे शाळेची इमारत व मोकळ्या जागेत मुख्यालयाचे कामकाज सुरू असून ही जागा अपुरी पडत आहे.

औद्योगिक क्षेत्रात अधिक सुरक्षितता निर्माण व्हावी, यासाठी विविध स्तरावर नियोजन केले जात आहे. महाळुंगे एमआयडीसी व चाकण पोलिस ठाण्याचे विभाजन करून दोन नवीन पोलिस ठाणे निर्माण करण्याच्या संदर्भातला प्रस्ताव शासनाकडे सादर केला आहे. त्यास लवकरच मंजुरी मिळेल, अशी अपेक्षा आहे. तसेच चाकण परिसरासाठी नवीन परिमंडळ निर्माण करण्याचेही नियोजित आहे.
- विनयकुमार चौबे, पोलिस आयुक्त, पिंपरी चिंचवड