पिंपरी, ता. १४ ः एकीकडे पीएमपी बस प्रवाशांना ऊन, वारा आणि पावसापासून संरक्षण मिळण्यासाठी झाडांचा आधार घ्यावा लागत आहे. मात्र, दुसरीकडे पीएमपी प्रशासनाने सेवा रस्त्यावरुन बस धावत नसतानाही लाखो रुपये खर्चून नवीन स्टेनलेस स्टीलचे निवारा शेड उभारल्याचे उघडकीस आले आहे. मात्र, तब्बल १५ महिन्यांनंतर प्रशासनाला अखेर शहाणपण सुचले असून त्यांनी आता बस शेड काढण्यास सुरुवात केली आहे.
पुणे महानगर परिवहन महामंडळाकडून (पीएमपीएमएल) पुणे आणि पिंपरी चिंचवड शहरात १५० हून अधिक नवीन स्टेनलेस स्टीलचे बस शेड बसविण्यात आले आहेत. तर पिंपरी चिंचवड शहरात २० बस शेड बसविण्यात आले. त्यातील ९ बस शेड हे निगडी - दापोडी बीआरटी मार्गाला समांतर मार्गावर बसविले आहेत. या मार्गावरून जाणाऱ्या सर्व बस बीआरटी मार्गातून जात असल्याने सेवा रस्त्यावर नव्याने बसविलेल्या बस शेडचा वापर होत नव्हता. आकुर्डीत बीआरटी बसथांब्यासमोर स्टेनलेस स्टीलचा बसथांबा असून नवीन बस शेड बसविली होता. पण, मेट्रो कामामुळे सहाच महिन्यांत हा बस शेड काढावा लागला. द क्लोवर हॉटेल, एम्पायर इस्टेट येथेही नवीन बस शेड बसविला होता. हा बस शेडही दहा महिन्यांतच काढून टाकण्यात आला. एच.ए सारखे काही थांबे मद्यपीचे अड्डे झाले होते. मात्र, आता पुन्हा एकदा खराळवाडी आणि एच. ए. कंपनी समोरील बस शेडही काढून टाकण्यात आले आहेत.

बससेवा नाही; मग, शेड का ?
शहरात एका बाजूला गर्दीच्या ठिकाणी बस शेड नसल्यामुळे प्रवाशांना ऊन, वारा आणि पावसात उभे राहावे लागत आहे. काही ठिकाणी झाडांचा आधार घ्यावा लागत आहे. पावसाळ्यात तर प्रवाशांची मोठ्या प्रमाणात गैरसोय होत आहे. पण, दुसऱ्या बाजूला बसच जात नाहीत, अशा मार्गांवर मात्र लाखो रुपये खर्च करून नवीन बस शेड बसविण्यात आल्या. या बस थांब्यांवरून बसच जात नसेल; तर येथे बस शेड बसविण्याचे प्रयोजन काय ? असा सवाल नागरिकांकडून केला जात आहे.

कुठे होते बस शेड ?
आकुर्डी, द क्लोवर हॉटेल एम्पायर इस्टेट, मोरवाडी, खराळवाडी, एच. ए. कंपनी, वल्लभनगर, कासारवाडी, दापोडी

बस शेड बसविण्यापूर्वी प्रशासनाला त्या मार्गावरुन बस जाते की नाही, याची माहिती नव्हते का ? ठेकेदाराच्या भल्यासाठी हे बस शेड बसविले होते. प्रशासनाकडून नागरिकांच्या पैशांची उधळपट्टी सुरू आहे. हे बस शेड बसविण्यासाठी आणि काढण्यासाठी खर्च झाला. ज्या अधिकाऱ्यांनी चुकीच्या ठिकाणी हे शेड बसवायला सांगितल्या. त्यांच्या पगारातून तो खर्च वसूल करावा.
- संजय शितोळे, मानद सचिव, सजग नागरिक मंच

महापालिकेच्या कामासाठी काही ठिकाणचे बस शेड काढले आहेत. तर काही बस शेड काढून प्रवाशांची गर्दी असते त्या ठिकाणी बसविण्यास सांगितले आहे.
- सतीश गव्हाणे, मुख्य वाहतूक व्यवस्थापक, पीएमपीएमएल