पिंपरी, ता. १४ : कंपनीतील सुमारे पाच लाख रुपये किंमतीच्या मालाचा अपहार केल्याप्रकरणी भोसरी एमआयडीसी पोलिसांनी तीन आरोपींना अटक केली. या प्रकरणी दीपू सिंह (रा. शाहूनगर, चिंचवड) यांनी भोसरी एमआयडीसी पोलिस ठाण्यात फिर्याद दिली आहे. त्यानुसार पोलिसांनी कमलेश निषाद (वय २९, रा. शाहूनगर, चिंचवड), दीपक लेवा (वय ३४, रा. चिंचवड) आणि उमर फारुख शेख (रा. नेहरूनगर, पिंपरी) अशी अटक आरोपींची नावे आहेत. आरोपी हे पिंपरीतील एका कंपनीत काम करतात. त्यांनी संगनमत करून कंपनीतील माल ट्रकमध्ये भरला. हा माल कंपनीच्याच मावळ येथील प्लँटमध्ये घेऊन जाण्याऐवजी आरोपींनी त्याचा परस्पर अपहार करून कंपनीचा विश्वासघात केला.