पिंपरी, ता. १६ ः पर्यावरण संतुलन राखण्यासाठी वृक्ष लागवडीबरोबरच त्यांचे संवर्धनही तितकेच महत्वाचे आहे. त्यामुळे ‘सकाळ’ आणि यशदा रिॲलिटी यांच्यातर्फे रविवारी (ता. २४) ‘एक सदनिका, एक झाड’ अर्थात ‘एक कुटुंब, एक झाड’ अशी ही संकल्पना घेऊन वृक्षारोपण केले जाणार आहे. या मोहिमेत प्रत्येक नागरिकाने सहकुटुंब सहभागी होऊन शहर सुंदर व हरित करण्यासाठी योगदान देण्याचे आवाहन संयोजकांनी केले आहे.
यशदा रिॲलिटी’ हे बांधकाम क्षेत्रातील नामांकित नाव आहे. ग्राहकांना परवडतील असे गृहप्रकल्प उभारून त्यांच्या स्वप्नातील घरे उपलब्ध करून द्यायचे, हा त्यांचा प्रमुख उद्देश असला तरी, निसर्गाचे व समाजाचे आपण काही तरी देणे लागतो, या भावनेतून वृक्षारोपण आणि संवर्धनाचा वसा त्यांनी घेतला आहे. सकाळ माध्यम समूहाची साथ त्यांना लाभली आहे.

तीन वर्षे राखणार निगा
या उपक्रमात केवळ वृक्षारोपण करायचे नसून पुढील तीन वर्षे त्यांचे संगोपन व संवर्धनही केले जाणार आहे. त्यासाठी नैसर्गिक खत, पाण्याची व्यवस्था केली जाणार आहे. जनावरांपासून संरक्षणासाठी प्रत्येक रोपाची निगा राखली जाणार आहे. ‘यशदा रिॲलटी’च्या ग्राहकांच्या हस्ते त्यांच्या कुटुंबीयांच्या उपस्थितीत वृक्षारोपण केले जाणार आहे. सुमारे दोन हजार झाडे लावण्याचे उद्दिष्ट आहे. शिवाय, यापूर्वी विक्री केलेल्या सदनिकाधारकांच्या हस्तेही वृक्षारोपण केले जाणार आहे.

संतांच्या साक्षीने उपक्रम
पर्यावरण संवर्धन आणि वृक्षांचे महत्त्व संतांनी अधोरेखित केले आहे. शिवाय, यावर्षी संत ज्ञानेश्वर माउली यांचा ७५० वा जन्मोत्सव आणि संत तुकाराम महाराज यांचा ३७५ वा वैकुंठगमन सोहळा आहे. त्याचे औचित्य साधून सकाळ माध्यम समूह आणि ‘यशदा रिॲलिटी’ यांच्यातर्फे हा उपक्रम आयोजित केला आहे. त्यामध्ये सर्वांना सहभागी होण्याचे आवाहन केले आहे. त्याला प्रतिसाद देत अनेक नागरिक कुटुंबासह या उपक्रमात सहभागी होत आहेत.
चला ! तर मग, वृक्षारोपणाच्या आगळ्यावेगळ्या उपक्रमात सहभागी होऊ या आणि पुढच्या पिढीसाठी एक सुंदर भविष्य निर्माण करु या.

अधिक माहितीसाठी संपर्क ः अक्षय - ९५६१३१४६७९

नागरिक म्हणतात...
सकाळ उद्योग समूह आणि यशदा रिॲलिटी ग्रुप यांच्या संयुक्त विद्यामाने निसर्ग संवर्धनाचा जो उपक्रम हाती घेतला आहे. तो अत्यंत स्तुत्य आहे. प्रत्येकाने त्यात सहभागी होऊन पर्यावरणाचे संतुलन राखण्यास हातभार लावावा. मी सहभागी होणार आहे. तुम्हीही सहभागी व्हा आणि वृक्षारोपण करा.
निलीमा साठे, (यशदा विंडसाँग)

वृक्ष लागवड मोहीम ही केवळ झाडे लावण्यापुरती मर्यादित नाही. तर आपल्या पृथ्वीचे संगोपन आणि पुढील पिढ्यांसाठी शाश्‍वत वारसा निर्माण करण्यासाठी आहे. आज आपण लावलेले प्रत्येक झाड आशा, निःस्वार्थ आणि उज्वल भविष्यासाठी आपली वचनबद्धता दर्शविणार आहे. चला, एक समुदाय म्हणून एकत्र येऊ या, निसर्गाची काळजी घेण्यासाठी एकमेकांना प्रेरित करु या.
- शैलेश चासकर, (यशदा वांटेज)