पिंपरी, ता. १६ : सोनसाखळी चोरी करणाऱ्या सराईत चार सोनसाखळी चोरट्यांना पिंपरी चिंचवड पोलिसांच्या गुन्हे शाखा युनिट तीनच्या पथकाने अटक केली. या आरोपींकडून पंधरा गुन्हे उघडकीस आले असून त्यांच्याकडून १२ लाख ३१ हजार रुपये किंमतीचे १०.३ तोळे सोने व दोन दुचाकी जप्त केल्या आहेत.
अक्षय राज शेरावत (वय २६, रा. हिंगणगाव ता. हवेली जि.पुणे), ऋषी बुद्धिमान नानवत (वय २३, रा. आष्टापूर फाटा ता. हवेली जि. पुणे), अरमान प्रल्हाद नानावत (वय २६, रा. वढू खुर्द ता. हवेली जि.पुणे), सोनू फिरोज गुडदावत (वय २०, रा. सणसवाडी ता. शिरुर जि.पुणे) अशी अटक केलेल्या आरोपींची नावे आहेत. या आरोपींकडून सोने विकत घेणारा खुशालसिंग जोधसिंग राव (वय ४३, रा. अंबरनाथ पश्चिम, ठाणे) यालाही पोलिसांनी अटक केली आहे. या आरोपींना ताब्यात घेऊन चौकशी केली असता त्यांनी पिंपरी चिंचवड, पुणे शहर, पुणे ग्रामीण तसेच अहिल्यानगर जिल्ह्यात सोनसाखळी चोरीचे गुन्हे केल्याची कबुली दिली. या चार आरोपींकडून सोनसाखळी चोरीचे बारा, सदोष मनुष्यवधाचा एक, वाहनचोरी १, घरफोडी १ असे एकूण १५ गुन्हे उघडकीस आले.

महिलेचा मृत्यू
अहिल्यानगर येथील सुपा येथे २० मे २०२५ रोजी अक्षय शेरावत व ऋषी नानावत हे एका महिलेची सोनसाखळी हिसकावित असताना संबंधित महिला रस्त्यावर पडली. त्यामध्ये तिचा मृत्यू झाला. या गुन्ह्यात हे दोघे फरार होते.