पिंपरी, ता. १८ : नुकत्‍याच झालेल्‍या तलाठीच्‍या परीक्षेतून उत्‍तीर्ण झालेल्‍या नवीन तलाठ्यांची पिंपरी-चिंचवड अप्‍पर तहसील कार्यालयांतर्गत नियुक्‍ती झाली आहे. सध्या ३० तलाठी कार्यरत आहेत. मात्र या नवीन तलाठ्यांना कार्यालयच उपलब्ध नाही. त्‍यामुळे ११ तलाठी कार्यालयात बसून, त्‍यांना ३१ कार्यालयाचा कारभार करावा लागत आहे. कार्यालयाअभावी तलाठ्यांची परवड होताना दिसत आहे.
पिंपरी चिंचवड अप्पर तहसील कार्यालयाअंतर्गत अगोदर भोसरी व चिंचवड ही दोनच मंडल व नऊ तलाठी कार्यालये होती. मात्र, नागरिकांच्या सोयीच्या दृष्टीने नव्याने निगडी, देहू व मोशी अशी तीन मंडल अधिकारी कार्यालय आणि २२ तलाठी कार्यालयांची निर्मिती शासनाने केली. मात्र, अगोदर या कार्यालयांसाठी तलाठी नव्हते. मात्र, नवीन तलाठी भरतीमध्ये देहू येथील विठ्ठलनगर तलाठी कार्यालय वगळता २१ तलाठी मिळाले आहेत. मात्र, त्यांना बसण्यासाठी कार्यालयच नसल्याने तहसील कार्यालयाकडून कार्यालयांसाठी जागांची शोधाशोध सुरू आहे. ११ पैकी नऊ तलाठी कार्यालयांचा कारभार भाड्याच्या जागेतून सुरू आहे.
पिंपरी-चिंचवड अप्पर तहसील कार्यालयाअंतर्गत येणाऱ्या पाच मंडल अधिकारी कार्यालयांपैकी दोनच कार्यालय शासकीय जागेवर उपलब्ध आहेत तर ३१ तलाठी कार्यालयांपैकी पिंपरी वाघेरे व किवळे हे दोनच कार्यालय शासकीय जागेत आहेत तर ३१ सजांचे कामकाज ११ कार्यालयांतून चालते. २० कार्यालयांना सध्या कार्यालय उपलब्ध नाही. त्यामुळे त्यांचे कामकाज इतर कार्यालयांतून चालत आहे. एका सजामध्ये दोन ते सहा तलाठ्यांचे दप्तर आहे. त्यामुळे एकाच कार्यालयांत नागरिकांची मोठी गर्दी होत आहे.

तलाठी कार्यालयातून होणारी कामे -
- जमीनधारकांच्या सात बारा उताऱ्यांचे नोंदवही तयार करणे व अद्ययावत ठेवणे.
- मोजणी, फेरफार, विभाजन, पुनर्निर्धारण आदी नोंदी करणे.
- जमीन मालकीबाबत वाद असेल, तर त्याची प्राथमिक चौकशी करणे.
- शेतजमिनीचा भूसंपादन कर, पाणीपट्टी महसूल वसूल करणे.
- पिकांची पाहणी करणे.
- पीक नोंदणी व हेक्टरी उत्पादन नोंदवही तयार करणे.
- नैसर्गिक आपत्तीमुळे झालेल्या नुकसानीची पाहणी व पंचनामे तयार करणे.
- उत्पन्न प्रमाणपत्र, जमीन धारणा प्रमाणपत्र, नक्षेतील उतारे.
- पावसाळ्यातील पूर, दुष्काळ यासारख्या आपत्तीच्या वेळी तपासणी अहवाल तयार करणे.
- जात व रहिवासी प्रमाणपत्रासाठी शिफारस.
- शासनाला आवश्यक असलेल्या सर्व माहितीचे संकलन.
- दर महिना व तिमाही अहवाल पाठवणे.

‘‘नवीन तलाठी नियुक्‍त झाले आहेत. सात तलाठी कार्यालयांच्‍या जागेसाठी जिल्हाधिकारी कार्यालयाकडे प्रस्ताव सादर केले आहेत. ३० तलाठी शासनाकडून मिळाले आहेत. मात्र, काही ठिकाणी कार्यालये उपलब्ध झालेले नाहीत.
- जयराज देशमुख, अप्पर तहसीलदार, पिंपरी चिंचवड.

-------------------------------