देहूरोड, ता. २२ : स्वच्छ देहूरोड, सुंदर देहूरोड अशा घोषणा देत देहूरोड कॅन्टोन्मेंट बोर्डकडून सार्वजनिक ठिकाणी स्वच्छतेबाबत जागृती केली जात आहे. स्वच्छता मोहिमा राबविल्याचे फलक ठिकठिकाणी लावले जात आहेत. मात्र प्रत्यक्षात अनेक ठिकाणी कचऱ्याचे ढीग साचलेले दिसत असून ही परिस्थिती चिंताजनक बनली आहे.
विकासनगर रस्त्यावर शंकर मंदिर परिसरात कचऱ्याचे मोठे ढिगारे निर्माण झाले आहे. त्यामुळे परिसरात दुर्गंधी पसरली असून नागरिकांच्या आरोग्यावर मोठा धोका निर्माण झाला आहे. त्यामुळे स्थानिक नागरिक तीव्र संताप व्यक्त करत आहेत. लाखो रुपये कचरा संकलनासाठी ठेकेदाराला दिले जातात, मग आरोग्य विभाग नेमके काय करतोय? असा थेट सवाल त्यांनी उपस्थित केला आहे. कचरा संकलन करणाऱ्या ठेकेदारावर आरोग्य विभागाचे नियंत्रण नसल्याने ही परिस्थिती निर्माण झाली असून प्रशासनाच्या निष्क्रियतेमुळे डासांचे प्रमाण वाढून डेंगी, मलेरिया यासारख्या साथीचे आजार पसरण्याचा धोका आहे. नागरिकांनी तत्काळ साफसफाई करून परिसराचे निर्जंतुकीकरण करण्याची मागणी केली आहे. केवळ फलक लावून नव्हे; तर प्रत्यक्ष कृती करूनच स्वच्छतेचे ध्येय साध्य होईल, असा पुनरुच्चार नागरिक करत आहेत.
दरम्यान, कॅंटोन्मेंट कार्यालयास सुटी असल्याने आरोग्य विभागाची अधिकृत प्रतिक्रिया मिळाली नाही. मात्र, तरीही आरोग्य निरीक्षक किरण गोंटे यांच्याशी मोबाईलवर संपर्क साधण्याचा प्रयत्न केला असता, त्यांनी फोन उचलला नाही.

सार्वजनिक ठिकाणी नागरिकांनी कचरा न टाकता आपल्या दारात येणाऱ्या कचरा वाहतूक गाडीतच कचरा टाकावा. उघड्यावरील कचरा आरोग्य कर्मचाऱ्यांनी लगेच उचलल्यास आरोग्याचा प्रश्न उद्भवणार नाही.
- अंजना साबळे, विकासनगर, किवळे
PNE25V25188