पिंपरी, ता. २५ : पुणे महानगर प्रदेश विकास प्राधिकरणाच्‍या (पीएमआरडीए) गृहप्रकल्‍पात असणाऱ्या भाडेकरूंची माहिती मूळ घरमालकांनी द्यावी, असे आवाहन ‘पीएमआरडीए’च्‍या वतीने करण्यात आले आहे. सेक्‍टर १२ मधील अनेक सदनिका भाडेतत्वावर देण्यात आल्याच्या तक्रारी प्रशासनाकडे प्राप्‍त झाल्‍या होत्या. त्या अनुषंगाने पीएमआरडीए प्रशासनाने हे आवाहन केले आहे. सोसायटीतील किती सदनिकांमध्ये भाडेकरू राहत आहेत, तशी माहिती कळवावी, असे पत्र गृहप्रकल्पातील प्रत्येक सोसायटीधारकांना काढले आहे.
पीएमआरडीएने उभारलेल्या गृहप्रकल्पात सदनिका या लॉटरीच्या माध्यमातून लाभार्थ्यांना देण्यात आल्या आहेत. प्रधानमंत्री आवास योजनेतंर्गत या घरांचे वाटप करण्यात आले. दरम्यान, यापैकी अनेक सदनिकांचे वाटप केल्यानंतर सर्रासपणे भाड्याने दिले जात असल्याचे निदर्शनास आले आहे. या प्रकल्पातील जवळपास ६० टक्क्यांहून अधिक सदनिका या भाडेतत्वावर देण्यात आल्या आहेत. याबाबत वेगवेगळ्या सहकारी संस्थेचे अध्यक्ष व अन्य पदाधिकारी यांनी तक्रार केली होती. त्याची दखल घेत पीएमआरडीएच्या अभियांत्रिकी आणि जमीन व मालमत्ता विभागाने बैठक घेतली. त्यानुसार भाड्याने दिलेल्या सदनिकांवर कारवाई करण्यात येणार आहे.
या प्रकरणी सदनिकाधारकांना त्याच्या सोसायटीमध्ये राहणाऱ्या भाडेकरूंची माहिती मागविण्यात आली आहे. पेठ क्रमांक १२ येथील फेज एक, फेज दोन या अंतर्गत सदनिकाधारकांनी सदनिका भाड्यांनी दिलेल्या आहेत. त्याची यादी तत्काळ अभियांत्रिकी विभागास कळवावी, असे पत्र सोसायाटीधारकांना पाठवले आहे. त्या अनुषंगाने संबंधित सदनिका धारकांना नोटीस काढण्यात येणार आहे.