पिंपरी, ता. १८ ः पिंपरी चिंचवड महापालिकेची निवडणूक जाहीर झाल्यानंतर काँग्रेस पक्षाने तयारीला वेग दिला आहे. महाराष्ट्र प्रदेश काँग्रेस कमिटीचे प्रदेशाध्यक्ष हर्षवर्धन सपकाळ यांच्या आदेशानुसार पिंपरी-चिंचवड महानगरपालिका निवडणुकीसाठी समन्वय समिती गठित करण्यात आली आहे.
या समितीत अखिल भारतीय काँग्रेस कमिटीचे सचिव पृथ्वीराज साठे, पिंपरी चिंचवड शहर जिल्हा काँग्रेस कमिटीचे अध्यक्ष डॉ. कैलास कदम, महाराष्ट्र प्रदेश काँग्रेस कमिटीचे सरचिटणीस बाबू नायर, सचिव निगार बारस्कर, माजी नगरसेवक तुकाराम भोंडवे तसेच चिंचवड ब्लॉक काँग्रेस कमिटीचे माजी अध्यक्ष संदेश नवले यांचा समावेश आहे. ही समिती आगामी निवडणुकीसाठी महाविकास आघाडी तसेच अन्य मित्र पक्षांशी युतीबाबत चर्चा करणार आहे. जिल्हा निवड मंडळाच्या बैठकीनंतर या समितीने सविस्तर चर्चा करून इच्छुक उमेदवारांची यादी व शिफारशी राज्य निवड मंडळासमोर सादर कराव्यात, असे निर्देश देण्यात आल्याची माहिती काँग्रेस पक्षाचे वरिष्ठ उपाध्यक्ष ॲड. गणेश पाटील यांनी दिली.
-----