पिंपरी, ता. १९ : शहरातील घनकचरा व्यवस्थापनाबाबत महापालिकेकडून विविध उपक्रम राबवले जात आहे. कचरा विलगीकरणाबाबत जनजागृती केली जात आहे. नागरिकांनी कचरा संकलनासाठी आलेल्या महापालिकेच्या घंटागाडीत ओला आणि सुका कचरा विलगीकरण करून द्यावा, असे आवाहन महापालिकेच्या आरोग्य विभागाने केले आहे.
घनकचरा व्यवस्थापन अधिनियम २०१६ नुसार घरगुती तसेच व्यावसायिक कचऱ्याचे विलगीकरण करून देणे बंधनकारक आहे. त्यानुसार नागरिकांनी ओला कचरा, सुका कचरा, घरगुती घातक कचरा, सॅनिटरी कचरा, ई-कचरा असे प्रकार विलगीकरण करून द्यावेत. योग्य पद्धतीने विलगीकरण झाल्यास पुढील टप्प्यांमध्ये कंपोस्टिंग व पुनर्वापर प्रक्रिया सुलभ होते. कचरा संकलनावेळी तपासणीसाठी आरोग्य विभागाची निरीक्षण पथके कार्यरत आहेत. नियमांचे पालन न झाल्यास कारवाई करण्यात येईल, असा इशारा आरोग्य विभागाचे उपायुक्त प्रदीप ठेंगल यांनी दिला.
----------

कचऱ्याचे प्रकार

- ओला कचरा : भाजीपाल्याच्या साली, अन्नाचे उरलेले तुकडे, फुलांचा कचरा, बागेतील पाने व अन्य जैविक कचरा.
- सुका कचरा : प्लास्टिक, कागद, धातू, बाटल्या, पॅकेजिंग साहित्य, थर्माकोल तसेच इतर पुनर्वापरयोग्य वस्तू.
- घरगुती घातक कचरा : ट्यूबलाईट, बॅटरी, बल्ब, तुटलेल्या धारदार वस्तू, रसायने, इंजेक्शन व जैववैद्यकीय कचरा.
- सॅनिटरी कचरा : सॅनिटरी पॅड्स, डायपर्स, बँडेजेस.
- ई-कचरा : बिघडलेले संगणक, लॅपटॉप, सीपीयू, दूरदर्शन संच तसेच इतर इलेक्ट्रिक व इलेक्ट्रॉनिक उपकरणे.
-----