चिंचवड, ता.१ ः चिंचवडेनगर येथील दगडोबा चौक हा सध्या कायमस्वरूपी कचऱ्याचा ढीग बनला आहे. सकाळ, दुपार व संध्याकाळी येथे सातत्याने कचरा टाकला जात आहे. त्याने रोगराई पसरण्याची भीती रहिवासी व्यक्त करत आहेत.
मात्र, महापालिकेच्या आरोग्य विभागाकडून कोणतीही ठोस उपाययोजना करण्यात आलेली नाही.
यामुळे परिसरात दुर्गंधी पसरली असून आरोग्यावर परिणाम होण्याची शक्यता वाढली आहे. स्थानिक नागरिकांनी महापालिकेच्या आरोग्य विभागाला विनंती केली आहे की, दगडोबा चौकाची नियमित साफसफाई केली जावी, कचरा टाकणाऱ्यांवर दंडात्मक कारवाई करावी. संध्याकाळच्यावेळेस या जागेवर काही दिवस एक कर्मचारी नेमावा, जेणेकरून पुढे कोणीही येथे कचरा टाकणार नाही. तसेच महापालिकेच्या ‘ब’ क्षेत्रीय कार्यालयात अनेक वेळा तक्रारी व अर्ज दिले. तरीही अद्याप कोणतीही कार्यवाही झालेली नाही. या ठिकाणी वारंवार कचरा टाकला जातो. त्यामुळे तिथे ‘कचरा टाकू नये’, ‘कचरा टाकला तर दंड केला जाईल’, अशा आशयाचे सूचना फलक लावणे गरजेचे आहे. परंतु जनसंवाद सभेमध्ये सहाय्यक आरोग्य अधिकारी सुधीर वाघमारे यांना वारंवार सांगून देखील अजूनही फलक लावण्यात आलेले नाहीत. फक्त अधिकाऱ्यांकडून फलका संदर्भात पत्र दिले आहे, असेच वारंवार सांगितले जात आहे.

संपूर्ण रस्त्यावर तसेच आमच्या दुकानासमोर भाजीपाल्यांच्या हातगाड्या लागलेल्या असतात. संध्याकाळी हे विक्रेते त्यांचा कचरा तसेच इतरही सर्व कचरा तिथेच टाकतात. त्यामुळे रहिवाशांचे, विशेषतः लहान मुलांच्या आजारपणाचे प्रमाण वाढलेले आहे. तरी प्रशासनाने यावर ताबडतोब काहीतरी उपाययोजना करावी अशी अपेक्षा आहे.
- सुनील नालकर, स्थानिक रहिवासी

दगडोबा चौकात वारंवार कचरा टाकला जातो. तेथे लवकरच उपाययोजना केल्या जातील. तसेच दंडा संदर्भातील नावाचे फलक देखील बसवले जातील. जेणेकरून लोक कचरा टाकणार नाहीत.
- भूषण शिंदे, मुख्य आरोग्य निरीक्षक, ‘ब’ क्षेत्रीय कार्यालय
CWD25A01462