पिंपरी, ता. १ : ‘ई-चलन’ कार्यप्रणालीच्या माध्यमातून सुरू असलेल्या दंडात्मक कारवाईविरोधात मालवाहतूक संघटनांनी आक्रमक भूमिका घेतली आहे. पिंपरी-चिंचवड शहरातील मालवाहतूक संघटनाही या आंदोलनात सहभागी झाल्या असून अत्यावश्‍यक सेवा वगळता सर्वच मालवाहतूक सेवा बंद ठेवण्याचा निर्णय त्यांनी घेतला आहे. त्यामुळे उद्योगनगरीतील कंपन्यांमधील उत्पादनासह आयात परिणाम होण्याची शक्यता आहे.

पिंपरी-चिंचवड शहरालगत चाकण, भोसरी आणि तळेगाव दाभाडे एमआयडीसी आहेत. शहरात वाहन, औषध निर्मितीसह इतर अनेक छोटे-मोठे उद्योग सुरू आहेत. या उद्योगांना कच्चा माल, यंत्रसामग्री पुरवण्यासाठी रस्ते वाहतूक महत्त्वाची भूमिका बजावत आहे. तसेच शहरातून जुना पुणे-मुंबई महामार्ग, पुणे-नाशिक आणि पुणे-बंगळूर हे राष्ट्रीय महामार्ग जातात. यावरून दररोज हजारो अवजड वाहने ये-जा करतात. या वाहनांवर सीसीटीव्ही आणि जीपीएस यंत्रणेद्वारे आधारित, तसेच वाहतूक पोलिसांकडून कारवाई केली जाते. अवास्तव दंड तसेच तांत्रिक अडचणींमुळे चुकीच्या नोटीस मिळण्याचे प्रकारही वाढले आहेत. या अन्यायकारक कारवाईविरोधात मालवाहतूक संघटनांनी बुधवारपासून बंदची हाक दिली. बंदमध्ये मालवाहतूक करणाऱ्या राज्यातील विविध ३० संघटना सहभागी झाल्यामुळे मालवाहतुकीवर मोठा परिणाम होण्याची शक्यता आहे.

शहरातील सर्वच संघटना मध्यरात्रीपासून चक्काजाम आंदोलनात सहभागी होणार आहेत. वाहनचालकांनाही आंदोलनात स्वयंस्फूर्तीने सहभागी होण्याचे आवाहन केले आहे. अत्यावश्‍यक सेवा वगळता सर्वच मालवाहतूक बंद ठेवणार आहोत.
- गौरव कदम, कार्याध्यक्ष, असोसिएशन ऑफ ट्रान्सपोर्ट, पुणे

अनेकदा चुकीची कारवाई केली जाते. त्याचा परिणाम वाहनचालकांच्या आर्थिक व मानसिकतेवर होतो. गेल्या अनेक वर्षांपासून या समस्यांवर उपाययोजना करण्याची मागणी केली होती. पण, याकडे शासनाने कायमच दुर्लक्ष केले. चक्काजाम आंदोलनात आमची संघटनाही सहभागी होणार आहे.
- उदय दळवी, अध्यक्ष, महाराष्ट्र वाहतूक सेना

संघटनांच्या प्रमुख मागण्या
- ई-चलनाद्वारे आकारण्यात आलेले दंड माफ करावेत
- अन्यायकारक दंड वसुली सुरू आहे, ती थांबवावी
- अनेक शहरांमध्ये मालवाहतूक वाहनांना बंदी केली आहे याचा पुनर्विचार करावा
- मालवाहतूक करणाऱ्या वाहनावर क्लिनर असावा, ही अट रद्द करावी