श्रावण जाधव ः सकाळ वृत्तसेवा
मोशी, ता. १ : आषाढी वारी हा महाराष्ट्राचा सामाजिक, सांस्कृतिक आणि खरा आध्यात्मिक सोहळा. सातासमुद्रापार मराठी कुटुंबांमध्ये तिची अनुभूती घेतली जात आहे. मागील ७० दिवसांत जगभरातील २२ देशांतून सुमारे १६ हजार किलोमीटरपेक्षा जास्त प्रवास करुन श्री विठ्ठल-रुक्मिणीच्या पादुका इंग्लंडमध्ये नुकत्याच दाखल झाल्या. विष्णुमय जग वैष्णवाचा धर्म, भेदाभेद भ्रम अमंगळ ! हा भाव ठेवत शेकडो मराठीजन तेथील दिंडी सोहळ्यात सहभागी झाले.
पंढरपूरातील श्री विठ्ठल मंदिरातून श्री विठ्ठल रुक्मिणीच्या पादुका १४ एप्रिल रोजी लंडनच्या दिशेने निघाल्या. त्यावेळी लंडनमधील विठ्ठलभक्त अनिल खेडकर यांच्याबरोबर मोशीमधील रहिवासी आणि सध्या इंग्लंडच्या लॅमिंग्टन स्पा (वार्विक)
इथे स्थायिक झालेले शरद कदम हे देखील उपस्थित होते. या पादुका आता २२ देशांतून प्रवास करून इंग्लंडमध्ये पोहोचल्या आहेत. इंग्लंडभर जिथे जिथे मराठी माणसे आहेत. त्या शहरात या पादुका दर्शनासाठी ठेवण्यात येत आहेत. त्यानुसार वॉरिक येथील लॅमिंग्टन स्पा शहरामधील कॅम्पियन स्कूलमध्ये विठ्ठलाच्या पादुका रविवारी (ता. २९) दर्शनासाठी ठेवण्यात आल्या. या कार्यक्रमाचे आयोजन ‘लॅमिंग्टन मराठी’ संस्थेच्यावतीने करण्यात आले होते.

पालखी सोहळ्याचेही आयोजन...
सजविलेल्या पालखीमध्ये विठ्ठल - रुक्मिणीच्या पादुका व मूर्ती ठेवण्यात आल्या. सगळ्यात पुढे लहान मुलांनी विठ्ठल - रुक्मिणीची वेशभूषा केली होती. डोक्यावर तुळशी वृंदावन घेतलेल्या महिला, कपाळावर गंध, डोक्यावर टोपी आणि पारंपरिक वेश परिधान करून मराठी मंडळी कुटुंबासहित दिंडीमध्ये सामील झाली होती. पुढे शाळेच्या मोकळ्या मैदानात एक ‘रिंगण’ झाले. महिलांनी फुगड्या घातल्या. अभंग, गाणी याचा कार्यक्रम सुरू झाला. हरिपाठ झाला. लोकांनी पादुका दर्शन घेतल्यावर आरती झाली. पसायदानाने कार्यक्रमाची सांगता झाली.

इंग्लंडमध्ये स्थायिक महाराष्ट्रातील भाविकांना आषाढी वारीसह विठ्ठल- रुक्मिणीच्या दर्शनाची रुखरुख लागली होती. पंढरपूरहून आलेल्या पादुकांचा पालखी सोहळा, त्यांचे दर्शन घेऊन आम्हाला प्रत्यक्ष पंढरपूरची आषाढी वारी केल्यासारखेच वाटले. त्यामुळे यंदा पंढरीच्या वारीत सहभाग नसल्याची खंत थोडी फार कमी झाली.
- शरद कदम, लॅमिंग्टन स्पा (वार्विक) इंग्लड

PNE25V27756