पिंपरी, ता. २ : पुणे - मुंबई महामार्गावर चिंचवड स्टेशनजवळ धावत्या पीएमपी बसवर रस्त्याच्याकडेचे भले मोठे झाड कोसळले. ही घटना बुधवारी (ता. २) सकाळी दहा वाजता घडली. त्यामध्ये बसमधील सात प्रवासी किरकोळ जखमी झाले.
अर्बन स्ट्रीट अंतर्गत सुरू असलेल्या कामांमुळे झाड कोसळून दुर्घटना होण्याची ही दुसरी घटना आहे.
पिंपरी चिंचवड महापालिकेच्यावतीने पिंपरी, चिंचवड, आकुर्डी परिसरात जुन्या पुणे - मुंबई महामार्गालगतच्या सेवा रस्त्यावर अर्बन स्ट्रीट अंतर्गत रस्ता सुशोभीकरण आणि पदपथ, सायकल मार्गिका तयार केली जात आहे. पिंपरी ते आकुर्डी दरम्यान याच कामासाठी खोदकाम करण्यात आले आहे. त्यामुळे झाडांची मुळे उघडी पडली. सतत पडणाऱ्या पावसामुळे झाड रस्त्याच्या दिशेला झुकले आणि बुधवारी सकाळी धावत्या पीएमपी बस (एमएच १४/एनजी ५०३७) वर कोसळले. ही बस चिंचवड स्टेशन येथून निगडीच्या दिशेने जात होती. त्यावेळी बसमध्ये सुमारे ४० प्रवासी होते. दुर्घटनेची माहिती मिळताच पिंपरी चिंचवड अग्निशमन विभाग, पिंपरी पोलिसांनी घटनास्थळी धाव घेतली. रस्त्यावर झाड पडल्याने वाहतूक पूर्णपणे थांबली होती. अग्निशमन दलाच्या कर्मचाऱ्यांनी झाड कापून रस्ता वाहतुकीसाठी मोकळा केला. बसमधील जखमी प्रवाशांना नजीकच्या रुग्णालयात दाखल करण्यात आले.