पिंपरी, ता. २ : हिंजवडीतील प्रश्नासंदर्भात बुधवारी मुंबईत झालेल्या बैठकीत विविध मुद्द्यांवर चर्चा झाल्याचे ‘पीएमआरडीए’च्या अधिकाऱ्यांनी सांगितले. यामध्ये हिंजवडी आयटी पार्क टप्पा एक, दोन व तीनचा समावेश करणारा सविस्तर हायड्रॉलिक अभ्यास आणि वादळी पावसाच्या पाण्याचे व्यवस्थापन करण्याचा व्यवहार्यता अहवाल तयार करण्याचा समावेश होता.
राज्य सरकारच्या प्रधान सचिवांसोबत बैठक झाली. त्यामध्ये पीएमआरडीए, एमआयडीसी आणि इतर प्रशासकीय विभागातील अधिकाऱ्यांचा व प्रतिनिधींचा समावेश होता. बैठकीमध्ये हिंजवडीतील समस्या सोडविण्यासंदर्भात काही ठराव मांडण्यात आले. यामध्ये पीडब्ल्यूडी किंवा एमआयडीसी भूसंपादन प्रक्रिया सुरू करतील आणि रस्ते आणि उड्डाणपुलांच्या विकासाचे समन्वय साधतील. संबंधित एजन्सींनी तात्पुरती उपाययोजना म्हणून पर्यायी ड्रेनेज चॅनेलिंगचे काम तत्काळ हाती घ्यावे आणि सतत खड्डे दुरुस्तीचे काम करावे; ‘एमआयडीसी’ तातडीने १० टीपीडी एसडब्ल्यूएम सुविधा बांधेल. पीएमआरडीए संयुक्तपणे योग्य जमीन ओळखेल आणि एसडब्ल्यूएम प्रकल्पासाठी माण ग्रामपंचायतीला ती सोपवेल; सर्व विभागांनी पीसीएमसीकडून पीपीटी आणि नाला धोरणे मिळवावीत, संयुक्त अभ्यास करावा, एक व्यापक अंमलबजावणी अहवाल तयार करावा आणि त्यानुसार काम करावे, अशा ठरावांचा समावेश होता.