पिंपरी, ता. ७ ः ‘जाती अन् धर्म माणसाने निर्मिले आहेत. या चौकटी भेदून माणुसकीची जपणूक सर्वांनी करावी,’ असे प्रतिपादन ज्येष्ठ कवयित्री राधाबाई वाघमारे यांनी केले. न्यू इंग्लिश स्कूल माण येथील वै. मुरलीधर कंक मास्तर यांच्या स्मृतिप्रीत्यर्थ दिलासा संस्था आणि न्यू इंग्लिश स्कूल, माण, मुळशी यांच्या वतीने एस.एस.सी. परीक्षेत घवघवीत यश मिळविलेल्या विद्यार्थ्यांचा गुणगौरव सोहळा आयोजित करण्यात आला होता. या कार्यक्रमात त्या बोलत होत्या.
आषाढी एकादशीचे निमित्त साधून राधाबाई वाघमारे यांनी संत कान्होपात्रा यांचा ‘येते पंढरीला तुझ्या मी विठ्ठला| सुख दुःख सारे विसरायला||’ हा अभंग सादर केला. प्रसिद्ध लेखक नारायण कुंभार, वेदान्तश्री प्रकाशनचे सुनील उंब्रजकर, न्यू इंग्लिश स्कूलचे मुख्याध्यापक अंबादास रोडे, दिलासा संस्थेचे अध्यक्ष सुरेश कंक, कवी अरुण परदेशी, मुरलीधर दळवी यांची प्रमुख उपस्थिती होती. या कार्यक्रमाच्या निमित्ताने न्यू इंग्लिश स्कूल, माण येथील शालेय विद्यार्थ्यांच्या दिंडीचे आयोजन करण्यात आले होते.
पांडुरंगाची आरती म्हणून कार्यक्रमाला सुरुवात करण्यात आली. कवी शामराव सरकाळे यांनी ‘चंद्रभागेला भेटण्या चालली इंद्रायणी’ हे स्वरचित भक्तिगीत सादर केले. २०२५ या वर्षात शालान्त परीक्षेत यश मिळविलेले मिसबा खान, सुमेध राणे, हर्षल वाघमारे, ऋतुजा भांड, गणेश बिरादार यांना प्रशस्तिपत्र, रोख शैक्षणिक मदत मान्यवरांच्या हस्ते प्रदान करण्यात आली. सुनील उंब्रजकर यांनी नववीतून दहावीत गेलेल्या विद्यार्थ्यांशी संवाद साधला. विजय भांगरे, भीमराव वाढवे, साधना शिंदे, मनीषा मोरे, ज्योती गायकवाड, शीतल टकले, बाळासाहेब जाधव, सुदाम केळकर, बाळासाहेब माने यांनी संयोजन केले. गोकूळ गायकवाड यांनी प्रास्ताविक केले. संभाजी थिटे यांनी सूत्रसंचालन केले. मंगल गायकवाड यांनी आभार मानले.
---