प्रदीप लोखंडे : सकाळ वृत्तसेवा
पिंपरी, ता. ९ : पिरंगुट औद्योगिक क्षेत्र तसेच त्याला लागून असलेल्या रहिवासी भागांचा सर्वांगीण विकास साधण्यासाठी पुणे महानगर प्रदेश विकास प्राधिकरणाने (पीएमआरडीए) महत्त्वाचे पाऊल उचलले आहे. या भागातील वाहतूक व्यवस्था सुधारण्याच्या दृष्टीने सहा रस्ते विकास प्रकल्पांना प्रशासकीय मंजुरी देण्यात आली आहे. सध्या भूसंपादनाची प्रक्रिया सुरू झाली आहे. या प्रस्तावित रस्त्यांमुळे औद्योगिक उत्पादनाला वेग येणार आहे. तसेच स्थानिक लोकांना तसेच उद्योजकांना सहजगत्या वाहतुकीची सुविधा मिळणार आहे.
पिरंगुट परिसरातील पहिला प्रकल्प मुळशी तालुक्‍यातील उरवडे ते हिंजवडी फेज तीन रस्ता आहे. हा रस्‍ता तब्बल ७.१० किलोमीटर लांबी व ४५ मीटर रुंदीचा आहे. या रस्त्यासाठी अंदाजे १४.५० कोटी रुपयांचा खर्च अपेक्षित आहे. हा रस्ता हिंजवडी आयटी पार्कशी औद्योगिक वसाहतीला जोडून देणार असल्यामुळे दोन्ही भागातील व्यावसायिक व रहिवासींना मोठा दिलासा मिळणार आहे. दुसरा प्रकल्प नांदे ते लवळे रस्ता असून, हा सुमारे ३.९३ किलोमीटर लांब व ४५ मीटर रुंद असणार आहे. यासाठी सुमारे आठ कोटी रुपये खर्च अपेक्षित असून, नांदे व लवळे परिसरातील रहिवासी भागामधील कनेक्टिव्हिटी सुधारून वाहतुकीचा वेळ वाचणार आहे. तिसरा लहान प्रकल्प नांदे ते माण नवीन रस्ता आहे. तो केवळ १.५० किलोमीटर लांब व ३० मीटर रुंद असणार आहे. मात्र यासाठी सर्वाधिक १५ कोटी रुपयांचा खर्च प्रस्तावित आहे. या रस्त्यामुळे माण भागाशी थेट संपर्क सुलभ होणार आहे.
या सहा रस्त्यांच्या कामांमुळे पिरंगुट औद्योगिक क्षेत्राला नवसंजीवनी मिळणार आहे. उद्योगांना कच्चा माल व तयार माल वाहतूक करणे अधिक सोयीचे होईल. तसेच, स्थानिकांना रोजगाराच्या संधींमध्येही वाढ होईल. सध्या भूसंपादनाची प्रक्रिया सुरु आहे. पीएमआरडीएकडून पुणे जिल्‍हाधिकारी यांना तसा प्रस्‍ताव पाठविला आहे. त्यानंतर लवकरच कामांना प्रत्यक्ष गती मिळणार असल्याचे पीएमआरडीएने स्पष्ट केले आहे.

आणखी काही मार्ग
- रस्ता ः किलोमीटर ः खर्च (कोटीत)
- म्‍हाळुंगे ते हिंजवडी फेज एक ः १.५ किमी ः १३.५
- ठाकर वस्‍ती ते माण गावठाण ः २.४ किमी ः २०.८८
- सुर्या हॉस्पिटल ते ठाकर वस्‍ती ः ३.५ किमी ः ३०.४५

महिन्‍याभरात शेतकऱ्यांसोबत बैठक
सहा रस्‍त्‍यांसाठी प्रशासनाची मंजुरी मिळाली असून, भूसंपादन केल्‍यानंतर पुढील कार्यवाही होणार आहे. टीडीआरसाठी शेतकऱ्यांसोबत बैठक घेण्यात येणार आहे. या महिन्‍यात भूसंपादन केल्‍या जाणाऱ्या शेतकऱ्यांसोबत बैठक होणार आहे.

पिरंगुट औद्योगिक परिसराला जोडणाऱ्या सहा रस्‍त्‍यांना प्रशासकीय मान्‍यता दिली आहे. जिल्‍हाधिकाऱ्यांकडे भूसंपादनासाठी प्रस्‍ताव पाठविला आहे. त्‍यानंतर पुढील प्रक्रिया होईल. जमीन बाधित शेतकऱ्यांसोबत टीडीआरबाबत आम्‍ही या महिन्‍यात बैठक आयोजित करणार आहे.
- डॉ. योगेश म्‍हसे, आयुक्‍त. पीएमआरडीए