पिंपरी, ता. ९ : अपात्र शिधापत्रिका ओळख मोहिमेसाठी पिंपरी, चिंचवड आणि भोसरी या तीनही कार्यालयांतर्गत स्‍वस्‍त धान्‍य दुकानदारांकडून अर्ज मागविण्यात आले होते. मात्र, अर्ज दाखल करणाऱ्यांची संख्या कमी असल्‍याची स्‍थिती आहे. सध्या तीनही कार्यालयांतर्गत ७६ हजार हजार अर्ज प्राप्‍त झाले आहे. सध्या सरकारने या मोहिमेअंतर्गत कोणालाही अपात्र न ठरविण्याची सूचना केली आहे. त्‍यामुळे या योजनेची गती थांबलेली असल्‍याचे चित्र आहे.
शिधापत्रिकांमधून अपात्र लाभार्थींची छाननी करण्यासाठी ही मोहीम राबविण्यात येत आहे. त्यानुसार धान्य दुकानदारांना अर्ज गोळा करण्याच्या सूचना देण्यात आल्या होत्या. तीनही कार्यालयांतर्गत सुमारे साडे तीन लाख पात्र लाभार्थी धान्‍य घेत आहेत. या सर्वांकडून केलेले अर्ज कार्यालयात जमा करण्यात येत आहेत. शासनाने दिलेल्‍या मुदतीत सातत्‍याने वाढ केली जात आहे. सध्या पिंपरीतून तब्बल २५ हजार ९२६, चिंचवडमधून सात हजार ६०८ तर भोसरीतून सर्वाधिक ४२ हजार अर्ज प्राप्त झाले आहेत. मात्र, सध्या राज्य शासनाकडून पुढील कार्यवाहीसंदर्भात कोणत्याही प्रकारच्या सूचना आलेल्या नसल्याने या मोहिमेला गती मिळालेली नाही. त्यांची पुढील कार्यवाही थंडावलेली आहे.
प्राप्त अर्जांची छाननी करून कोणत्या शिधापत्रिकाधारकांना अपात्र ठरवता येईल याचा एकत्रित अहवाल तयार करून शासनाकडे सादर करण्याचे नियोजन आहे. मात्र, पुढील आदेश प्राप्त होईपर्यंत प्रत्यक्ष छाननी व कारवाईस सुरुवात न करण्याचे स्पष्ट आदेश असल्याचे सांगण्यात आले.

अर्ज केल्‍यास कार्यवाही
धान्‍य मिळावे यासाठी दिवसाकाठी सात अर्ज नागरिकांचे प्राप्‍त होत आहेत. ज्‍यांना खरच आवश्‍यकता आहे. त्‍यांच्‍यासाठी शिधापत्रिका कार्यालयाकडून धान्‍य उपलब्ध करून दिले जात आहे. मोहिमेतून अपात्र ठरविलेल्‍यांची संख्या कमी झाल्‍यास इतर गरजू लाभार्थी वाढतील, असेही अधिकारी सांगत आहेत.

सरकारकडून सध्या या मोहिमेअंतर्गत कोणालाही अपात्र करू नका, अशा सूचना आहेत. त्‍यानुसार कार्यवाही होईल. स्‍वस्‍त धान्‍य दुकानदारांकडून अर्ज मागविणे चालूच आहे. आलेल्‍या अर्जातून किती अपात्र होतात याची आकडेवारी तयार करून तसा अहवाल देणार आहे.
- विजयकुमार क्षीरसागर, परिमंडळ अधिकारी, चिंचवड