पिंपरी, ता. १२ : यंदाच्या शासकीय जिल्हास्तरीय शालेय क्रीडा स्पर्धा २०२५-२६चे आयोजन करण्यात येणार आहे. स्पर्धेत ९३ खेळांचा समावेश असून एकही विद्यार्थी खेळापासून वंचित राहणार नाही, यासाठी प्रयत्नशील राहण्याचे आवाहन करण्यात आले आहे. स्पर्धेचे बदलते नियम व मार्गदर्शक तत्त्वांबाबत शिक्षकांनी सजग राहावे, असे प्रतिपादन जिल्हा क्रीडा अधिकारी जगन्नाथ लकडे यांनी केले.
पिंपरी-चिंचवड महापालिका व जिल्हा क्रीडा परिषद यांच्या वतीने होणाऱ्या यंदाच्या शासकीय जिल्हास्तरीय शालेय क्रीडा स्पर्धेची नियोजन बैठक नुकतीच पिंपळे गुरव येथील नटसम्राट निळू फुले नाट्यगृह येथे शुक्रवारी (ता. ११) पार पडली. यावेळी जिल्हा क्रीडा अधिकारी जगन्नाथ लकडे बोलत होते. या बैठकीला महापालिकेच्या क्रीडा विभागाचे उपायुक्त पंकज पाटील, महाराष्ट्र राज्य शारीरिक शिक्षण महासंघाचे अध्यक्ष शरदचंद्र धारूरकर, दिव्यांग भवन फाउंडेशनचे परेश गांधी आदी उपस्थित होते.
बैठकीत स्पर्धेच्या नियोजनाची रूपरेषा ठरविणे, सहभागी शाळांची नोंदणी प्रक्रिया व पात्रता निकष निश्चित करणे यांचा समावेश होता. यंदा होणाऱ्या ९३ खेळांचे आयोजन, त्यांचे वेळापत्रक आणि त्यासाठी लागणाऱ्या क्रीडा सुविधा व मैदानांचे नियोजन यावर भर देण्यात आला. स्पर्धेसाठी परीक्षक, स्वयंसेवक आणि आयोजक यांची नियुक्ती कशी करावी, यावर मार्गदर्शन केले. दिव्यांग विद्यार्थ्यांसाठी स्वतंत्र गटातून स्पर्धा घेण्याबाबत चर्चा झाली. सूत्रसंचालन हरिभाऊ साबळे व दीपक कन्हेरे यांनी केले. रंगराव कारंडे व बाळाराम शिंदे यांनी आभार मानले.

‘‘आगामी जिल्हास्तरीय शालेय क्रीडा स्पर्धेसाठी सर्व शाळांनी जास्तीत जास्त सहभाग नोंदवावा. हॉकी, तिरंदाजी, कुस्ती, नेमबाजी, घोडेस्वारी या खेळासाठी आंतरराष्ट्रीय दर्जाचे खेळाडू घडवण्यासाठी ॲकॅडमीमार्फत सुविधा उपलब्ध करून दिल्या आहेत.
- पंकज पाटील, उपआयुक्त, क्रीडा व सांस्कृतिक विभाग, पिंपरी-चिंचवड महापालिका
---