पिंपरी, ता. १६ : पुणे महानगर प्रदेश विकास प्राधिकरणकडून (पीएमआरडीए) हिंजवडी, मारुंजी, माण या तिन्ही ठिकाणी रस्त्याचे सर्व्हेक्षण सुरू करण्यात आले आहे. पहिल्या टप्प्यात रस्त्यावरील अडथळा ठरणारे अतिक्रमण, अनधिकृत बांधकामे हटविण्यात येणार आहेत. त्यानंतर होर्डिंगदेखील काढण्यात येणार आहे. तसेच, नाल्यासंबंधित स्वतंत्र विभाग काम करत आहे. गुरुवारपासून (ता. १७) ही मोहीम हाती घेतली जाणार आहे.
हिंजवडी येथे वाहतूक कोंडीच्‍या समस्या मोठ्या झाल्‍या आहेत. याबाबत उपमुख्यमंत्री अजित पवार यांनी लक्ष घातल्यानंतर सर्वच विभाग खडबडून जागे झाले आहेत. त्यामध्ये विशेषतः पीएमआरडीएकडे मोठी जबाबादारी सोपविण्यात आली आहे. त्याअनुषंगाने दोन दिवसांपासून पीएमआरडीएच्या अनधिकृत बांधकाम निर्मूलन विभागाचे अधिकारी व कर्मचारी हे हिंजवडी दौऱ्यावर आहेत. या ठिकाणी मुख्यतः वाहतुकीला अडथळा ठरणाऱ्या जागांची पाहणी करण्यात आली आहे. त्याबाबतची माहिती गोळा करण्यात आली असून, गुरुवार (ता. १७) अनधिकृत बांधकामावर कारवाई केली जाणार असल्याचे पीएमआरडीए प्रशासनाने सांगितले.
नाल्याचा प्रवाह बंद केल्याप्रकरणी कारवाई सुरू आहे. प्रत्यक्षात यांपैकी काही जागांवर पीएमआरडीएच्या विकास परवानगी विभागाने बांधकामास मंजुरी दिली आहे. त्यामुळे त्यावर कारवाई करताना समस्या येत आहेत. इतर नाल्यांवर कंपन्या उभारल्या गेल्या आहेत. यावर प्रत्‍यक्ष कारवाईला लवकरच सुरुवात करणार असल्‍याचे अनधिकृत बांधकाम व निर्मुलन विभागाकडून सांगण्यात आले.
---