पिंपरी, ता. १६ ः पिंपरी-चिंचवड महापालिकेच्या कर आकारणी व कर संकलन विभागाने मागील आर्थिक वर्षात थकबाकी असलेल्या मिळकतधारकांवर जप्तीची कारवाई सुरू केली आहे. मात्र, चालू मिळकतकर ३० जूनपर्यंत भरणाऱ्यांना १० टक्क्यांपर्यंत सवलत दिली होती. आता ३० सप्टेंबरपर्यंत ऑनलाईन कर भरणाऱ्यांना सामान्य करात चार टक्के सवलत दिली जाणार आहे.
पिंपरी-चिंचवड शहरात निवासी, अनिवासी, औद्योगिक, मिश्र, व्यावसायिक, मोकळ्या जमिनी अशा मिळकती आहेत. गेल्या आर्थिक वर्षात ३४ हजार ७६९ मिळकतधारकांकडे १६० कोटी रुपये थकबाकी आहे. वारंवार नोटीस देऊनही कर भरण्यास त्यांच्याकडून टाळाटाळ केली जात आहे. त्यांना १८ विभागीय कार्यालयांमार्फत जप्तीपूर्व नोटीस बजावल्या आहेत.

सवलतींचा लाभ घ्या
चालू आर्थिक वर्षाच्या देयकांसोबत मागील थकबाकी भरण्याची नोटीस मिळकतकर थकबाकीदारांना महापालिका करआकारणी व करसंकलन विभागाने दिली आहे. जून अखेरपर्यंत थकबाकी भरण्याचे आवाहन त्यांना केले होते. त्यानंतरही काहींनी थकबाकी भरणा केलेला नाही, त्यांना जप्तीच्या कारवाईची नोटीस दिली जात आहे. ज्यांनी अद्यापही मिळकतकर भरलेला नाही, त्यांनी तत्काळ कर भरून सध्याच्या सवलतीचा लाभ घ्यावा, असे आवाहन महापालिकेने केले आहे.

तब्बल ३५ कोटी लाभ
चालू आर्थिक वर्षात ३० जूनपर्यंत मिळकतकर भरणाऱ्यांना महापालिकेने विविध सवलती दिल्या होत्या. त्याचा चार लाख १२ हजार मिळकतधारकांनी ३५ कोटी १६ लाख रुपये लाभ घेतला आहे.

दृष्टिक्षेपात...
एकूण मिळकती ः ७,२७,०००
गेल्या वर्षीचे थकबाकीदार ः ३४,७६९
३० जूनपर्यंत सवलत लाभार्थी ः ४,१२,०००

‘‘महापालिकेने ३० जून पूर्वी ऑनलाईन कर भरणाऱ्यांना सामान्य करात दहा टक्के सवलत दिली होती. आता ३० सप्टेंबरपर्यंत ऑनलाईन कर भरल्यास मिळकतकराच्या सामान्य करावर चार टक्के सवलत दिली जाणार आहे.
- अविनाश शिंदे, सहाय्यक आयुक्त, महापालिका
--