पिंपरी, ता. १६ : राज्‍य शासनाकडून जून, जुलै आणि ऑगस्‍ट या तीन महिन्‍यांचे धान्‍य वाटप करण्यासाठी मुदतवाढ दिली आहे. ३१ जुलैपर्यंत धान्‍य वाटप करता येणार आहे. त्‍यानुसार स्‍वस्‍त धान्‍य दुकानदारांनी ई-पॉस मशीनद्वारे धान्‍य वाटप करण्याच्‍या सूचना चिंचवड शिधापत्रिका कार्यालयाच्‍या वतीने देण्यात आल्‍या आहेत.
पावसाळ्यात उद्‍भवणारी पूर परिस्थिती व इतर नैसर्गिक आपत्तींच्या पार्श्वभूमीवर धान्‍य साठवणूक व वाहतुकीच्या समस्या निर्माण होतात. त्‍यासाठी सार्वजनिक वितरण व्यवस्थेवर त्‍याचा प्रभाव होऊ नये म्‍हणून केंद्र शासनाने मार्गदर्शक सूचना दिल्‍या होत्‍या. त्‍यानुसार जून, जुलै व ऑगस्ट या तीन महिन्यांचे एकत्रित अन्नधान्य वाटप ३० जून २०२५ पर्यंत पूर्ण करण्याच्या सूचना राज्‍यांना देण्यात आल्‍या होत्‍या. त्‍यानुसार पिंपरी, चिंचवड आणि भोसरी कार्यालयांतर्गत येणाऱ्या स्‍वस्त धान्‍य दुकानांद्वारे त्‍याचे वाटपही सुरू करण्यात येत आहे. मात्र, काही दुकानदारांना केवळ दोन महिन्‍यांचेच धान्‍य प्राप्‍त झाले आहे. दुकानदारांनी तशा तक्रारी कार्यालयात सादर केल्‍या होत्‍या. परिणामी, शिधापत्रिकाधारकांना एका महिन्‍याचे धान्‍य मिळण्यात प्रत्‍यक्ष विलंब होत असल्‍याचे दिसून येत होते.
राष्ट्रीय अन्नसुरक्षा योजनेतील लाभार्थ्यांना जून, जुलै व ऑगस्टमधील धान्य वाटप पूर्ण न झाल्याने ई-पॉस मशीनद्वारे ऑनलाईन अन्नधान्य वाटपास केंद्र शासनाने मुदतवाढ दिली. लाभार्थ्यांना ३१ जुलैपर्यंत धान्‍य वाटप पूर्ण करण्याची सूचना देण्यात आली आहे. त्‍यानुसार पिंपरी-चिंचवड शहरातील स्‍वस्‍त धान्‍य दुकानदारांना तशा सूचना देण्यात आल्‍या आहेत, अशी माहिती संबंधित अधिकाऱ्यांनी दिली.

‘‘तीन महिन्‍यांचे धान्‍य वाटप होत आहे. मात्र, सध्या दुकानात केवळ दोन महिन्‍यांचे धान्‍य प्राप्‍त झाले होते. शासनाकडून धान्‍य वाटप करण्याची मुदतवाढ दिल्‍याने जुलैअखेर धान्‍य वाटप केले जाईल.
- विजयकुमार क्षीरसागर, परिमंडळ अधिकारी, चिंचवड
---