पिंपरी, ता. १७ : महाराष्ट्र वैद्यकीय विमा सेवा, राज्य कामगार विमा योजना रुग्णालयासाठी सार्वजनिक आरोग्य विभागाने वैद्यकीय अधिकारी (गट अ) संवर्गातील ११६ जागांवर भरती केली आहे. त्यातील ११ अधिकारी पिंपरी-चिंचवडच्या मोहननगर येथील ईएसआय रुग्णालयात नियुक्त करण्यात आले आहेत. एका महिन्याच्या आत नियुक्त न झाल्यास संबंधित वैद्यकीय अधिकऱ्यांची नियुक्ती रद्द केली जाणार आहे.
पिंपरी-चिंचवड या औद्योगिक शहरासह लगतच्या औद्योगिक परिसरातील कामगारांना मोहननगर येथील ईएसआय रुग्णालयात मोफत दर्जेदार वैद्यकीय सेवा दिल्या जातात. मात्र, तेथे डॉक्टरांची ३७ पैकी २३ पदे रिक्त होती. यात अपघात वैद्यकीय अधिकारी- तीन, तर वैद्यकीय अधिकाऱ्यांच्या ७ जागा रिक्त होत्या. त्यामुळे रुग्णांना वेळेवर सेवा देण्यात अडथळे येत होते. या जागा भरण्यासाठी ‘ईएसआयसी’कडून राज्याच्या सार्वजनिक आरोग्य विभागाकडे पाठपुरावा करण्यात आला.
दरम्यान. ईएसआय रुग्णालयात येणाऱ्यांच्या संख्येत दिवसेंदिवस वाढ होत आहे. काही महिन्यांपूर्वी रुग्णालयात उपचारासाठी दररोज सरासरी ३०० ते ३५० रुग्ण यायचे. मात्र, आता ही संख्या ४५० ते ५०० पर्यंत पोहोचली. त्यातच वैद्यकीय अधिका-यांची संख्या कमी असल्यामुळे उपचार यंत्रणेवर ताण येत होता.

सार्वजनिक आरोग्य विभागाने ईएसआय रुग्णालयासाठी अकरा वैद्यकीय अधिकाऱ्यांच्या नियुक्तीचे आदेश काढले आहेत. हे वैद्यकीय अधिकारी लवकरच रुग्णालयात रुजू होतील. त्यानंतर रुग्णसेवेत अधिक सुधारणा दिसून येईल.
- डॉ. वर्षा सुपे, चिकित्सा अधीक्षक, ईएसआय रुग्णालय, मोहननगर