पिंपरी, ता. १७ ः वडमुखवाडी येथील २० फूट खोल नाल्यात अचानक एकजण पडल्याची घटना घडली. संकल्प गार्डनजवळ बुधवारी रात्री दहा वाजण्याच्या सुमारास हा प्रकार घडला. लखन धर्मसिंग (वय ३५) असे त्या जखमी व्यक्तीचे नाव आहे.
सहाय्यक पोलिस उपनिरीक्षक चंद्रकांत पारधी यांनी चोविसावाडी उपअग्निशमन केंद्र येथे त्याबाबत कळविल्यानंतर चोवीसावाडी अग्निशमन केंद्राचे २ वाहने व मोशी उपअग्निशमन केंद्राचे रेस्क्यू वाहनासह पथक घटनास्थळी जाऊन पाहणी केली. त्यावेळेस लखन धर्मसिंह हे वेदनेने मदतीसाठी विव्हळत असल्याचे आढळून आले. जवानांनी त्याला दोराच्या साहाय्याने स्ट्रेचरवर बाहेर काढले. त्यांच्या अंग, तोंड, डोके आणि पायाला मार लागला असून रुग्णवाहिकेमधून पुढील उपचाराकरिता खासगी रुग्णालयात पाठविण्यात आले.