पिंपरी, ता. २२ : पुणे महानगर प्रदेश विकास प्राधिकरणाने (पीएमआरडीए) दाखल केलेल्‍या नगर नियोजन (टीपी-टाऊन प्‍लॅनिंग) प्रस्तावातील होळकरवाडी क्रमांक चार आणि औताडे हांडेवाडी या योजनांना राज्‍य शासनाने हिरवा कंदील दाखविला.
नगररचना विभागाच्या सहा पैकी दोन योजनांना मंजुरी मिळाली. मांजरी कोलवाडी योजना रद्द झाली. विकास आराखडा रद्द केल्‍यानंतर प्रस्‍तावित ‘टीपी’ योजनेला मूर्त रूप मिळत आहे. ‘पीएमआरडीए’ने आपल्या हद्दीतील विकासकामे मार्गी लावण्यासाठी सहा ‘टीपी’ योजना राबविल्‍या आहेत. यामध्ये मुळशी तालुक्‍यातील माण म्हाळुंगे, हवेली तालुक्‍यातील वडाचीवाडी, हांडेवाडी, मांजरी येथे प्रत्‍येकी एक, तर होळकरवाडी येथे दोन ‘टीपी’ योजना राबविण्यात येतील. त्‍यासाठी ‘पीएमआरडीए’ने ३१ डिसेंबर २०२२ रोजी मंजुरी दिली. राज्‍य शासनाकडे लवादाने २०२३ मध्ये प्रस्‍ताव पाठविला होता.
चार जुलै रोजी प्रस्‍तावित योजनांपैकी होळकरवाडी क्रमांक चारला काही बदलांसह मंजूर करण्याची अधिसूचना प्रसिद्ध झाली होती. याच महिन्‍यात या योजनेची अंमलबजावणी होणार आहे. औताडे हांडेवाडी ही योजनाही मंजूर करण्यात आली. नागरिकांना याबाबत माहिती ‘पीएमआरडीए’च्या संकेतस्थळावर तसेच संबंधित विभागात एका महिन्‍याच्‍या कालावधीसाठी माहिती उपलब्ध असेल.
मांजरी कोलवाडी योजनेबाबत राज्‍य शासनाकडे काही निवेदने आली होती. त्‍यानुसार चौकशी करून माहिती मिळविण्यात आली. ही योजना सध्या तरी नामंजूर करण्याचे ठरले आहे.
----