पिंपरी, ता. २३ ः पुणे महानगर प्रदेश विकास प्राधिकरणाच्या (पीएमआरडीए) हिंजवडी व माणमधील भूखंडांचा लिलाव करण्याऐवजी या जागांवर पायाभूत सुविधा उभाराव्यात, अशी मागणी माण हिंजवडीतील नागरिक व आयटी कर्मचाऱ्यांनी केली आहे. भूखंडांचा लिलाव रद्द व्हावा यासाठी हिंजवडी एम्प्लॉयी अॅण्ड रेसिडेंट ट्रस्ट अर्थात ‘हार्ट पुणे’ या संघटनेने ‘पीएमआरडीए’चे आयुक्त योगेश म्हसे यांना निवेदनही दिले.
राजीव गांधी आयटी पार्कमुळे हिंजवडी माणमधील लोकवस्ती बरीच वाढली. मात्र तेथे पायाभूत सुविधांचा अभाव आहे. ग्रामपंचायतीकडून पुरेसा पाणीपुरवठाही होत नसल्याने येथील नागरिकांना पाण्यासाठी बोअरवेल व टँकरवर अवलंबून रहावे लागते. त्यामुळे पाण्याची टाकी, सार्वजनिक बस थांबे, आरोग्य केंद्र, सार्वजनिक रुग्णालय अशा पायाभूत सुविधा उभारणे ही सध्याची गरज आहे. या भागात लाखोंच्या संख्येने नागरिक राहत असूनही मोठी क्रीडांगणे, नाट्यगृहे, सांस्कृतिक केंद्र अशा सुविधांचाही अभाव आहे. त्यामुळे आधी नागरिकांच्या दैनंदिनी जीवनासाठी आवश्‍यक पायाभूत सुविधांसाठी जागा द्या; नंतर लिलाव करा, असे ‘हार्ट पुणे’ संघटनेने म्हटले आहे.
---
‘पीएमआरडीए’ विविध ३५ भूखंडांचा लिलाव करणार आहे, परंतु त्यापूर्वी ‘पीएमआरडीए’ने ग्रामपंचायत आणि जिल्हा परिषदेला हे भूखंड सार्वजनिक स्वरुपाच्या सुविधा निर्माण करण्यासाठी दिले पाहिजेत. या भूखंडांवर विकास आराखड्यामध्ये विविध पायाभूत सुविधांचे आरक्षण दिले तर त्याचा येथील नागरिकांना जास्त फायदा होईल. त्यामुळे हा लिलाव रद्द केला जावा.
- ज्ञानेंद्र हलसुरे, अध्यक्ष, ‘हार्ट पुणे’
---
भूखंडांची वर्गवारी
‘पीएमआरडीए’कडील भूखंडांची व्यावसायिक आणि विना व्यावसायिक अशा दोन गटांमध्ये वर्गवारी करण्यात आली. मात्र, ‘पीएमआरडीए’ने यातील लहान भूखंड पायाभूत सुविधांसाठी ठेऊन मोठे भूखंड व्यावसायिक वर्गात टाकल्याचा आरोपही नागरिकांनी केला आहे. आयुक्तांनी मात्र यावर माहिती घेऊन निर्णय घेऊ असे सांगितले आहे.
---
हिंजवडी माणमधील भूखंडाचा लिलाव रद्द करावा याचे निवेदन नागरिकांनी दिले आहे, मात्र पायाभूत सुविधांसाठी भूखंड राखीव ठेवण्यात आलेले आहेत, तसेच लिलावासाठी काढण्यात आलेले भूखंड व्यावसायिक वर्गातील आहेत. तरीही नागरिकांची मागणी पाहता याची माहिती घेऊन पुढील कार्यवाही केली जाईल.
- योगेश म्हसे, आयुक्त, ‘पीएमआरडीए’
-----