- भाजप आमदार महेश लांडगे यांच्या मागणीला प्रतिसाद

पिंपरी, ता. २८ : चाकण औद्योगिक क्षेत्रातील (एमआयडीसी) वाहतूक कोंडी आणि पायाभूत सुविधा सुधारण्यासाठी राज्य सरकारने हालचाली सुरू केल्या आहेत. याबाबत बुधवारी (ता. ३०) मुंबई येथे बैठक होणार आहे. सार्वजनिक बांधकाम मंत्री शिवेंद्रसिंहराजे भोसले आणि उद्योगमंत्री उदय सामंत यांच्यासह सर्व संबंधित अधिकारी बैठकीला उपस्थित असतील.

चाकण एमआयडीसीतील गंभीर समस्यांकडे सरकारचे लक्ष वेधण्यासाठी भाजप आमदार महेश लांडगे यांनी पुढाकार घेतला आहे. गेल्या आठवड्यात विविध औद्योगिक संघटनांच्या प्रतिनिधींनी लांडगे यांची भेट घेत मुख्यमंत्री देवेंद्र फडणवीस यांच्यासोबत चर्चा करुन कृती कार्यक्रम निश्चित करण्याबाबत मागणी केली होती. त्यानुसार, लांडगे यांनी मुख्यमंत्री कार्यालयाकडे पाठपुरावा केला. दरम्यान, या बैठकीत धोरणात्मक निर्णय होण्याची अपेक्षा व्यक्त केली जात आहे. गेल्या पावसाळी अधिवेशनात पुणे ग्रामीण व पिंपरी चिंचवडमधील विधानसभा सदस्यांनी आवाज उठवला होता. त्यामुळे चाकण आणि औद्योगिक क्षेत्राच्या प्रश्नांना वाचा फुटली आहे.
या बैठकीला अपर मुख्य सचिव, सार्वजनिक बांधकाम विभाग, सचिव (रस्ते), सार्वजनिक बांधकाम विभाग, मुख्य अभियंता, एमएसआयडीसी, मुख्य अभियंता, सार्वजनिक बांधकाम प्रादेशिक विभाग, पुणे, मुख्य अभियंता, एमआयडीसी, पुणे, प्रकल्प संचालक, भारतीय राष्ट्रीय राजमार्ग प्राधिकरण, पुणे, पोलिस उपायुक्त (वाहतूक), चाकणसह तळेगाव नगर परिषदेचे प्रमुख अधिकारी आणि लोकप्रतिनिधी उपस्थित राहणार आहेत.

‘अनग्लॉग चाकण एमआयडीसी’ या मोहिमेला केवळ पाठिंबा नव्हे, तर सक्रीयपणे चाकण वाहतूक कोंडी आणि समस्यामुक्त करण्यासाठी आम्ही सर्वोतोपरी पाठपुरावा करणार आहोत. आगामी काळात राज्याचे मुख्यमंत्री देवेंद्र फडणवीस यांच्या नेतृत्त्वातील भाजप-महायुती सरकार हिंजवडी आयटी पार्कच्या समस्या सोडविण्यासाठी काम करत आहे, त्याप्रमाणे चाकणच्या समस्या सोडवण्यासाठी आम्ही प्रयत्नशील आहोत.
- महेश लांडगे, आमदार, भाजप, भोसरी.