पिंपरी, ता. ४ ः निगडी-तळवडे या मार्गावरील ड्रेनेजची झाकणे (ड्रेन कव्हर) खचली आहेत. तर काही ठिकाणी रस्त्याच्या मधोमध असलेले ड्रेनेजचे झाकण तुटले आहेत. त्यामुळे अपघात होण्याचा धोका निर्माण झाला आहे. हा मार्ग देहूगाव, चाकण आणि उपनगरांना शहराशी जोडतो. तसेच शहरात येण्यासाठी हा महत्त्वाचा मार्ग असल्यामुळे येथे वर्दळ असते. मात्र, या मार्गावर अनेक ठिकाणी ड्रेनेजची झाकणे खचल्याने वाहतूक संथ होऊन कोंडीचा सामना करावा लागतो. ही झाकणे रात्री दिसत नाहीत. त्यामुळे विशेषतः दुचाकींचे अपघात होण्याचा धोका निर्माण होत आहे. महापालिका प्रशासनाने या मार्गावरील ड्रेनेजची झाकणे रस्त्याच्या समांतर करावीत, तसेच तुटलेली झाकणे दुरुस्त करावीत, अशी मागणी नागरिकांनी केली आहे.