पिंपरी, ता. ४ ः शहरातील अवकाळी पावसामुळे बहुतांश भागातील विद्युत पुरवठा खंडित झाला. त्याचबरोबर आकुर्डी, चिंचवड, पिंपळे सौदागर, रहाटणी या परिसरात दिवस-रात्र विजेचा लपंडाव सुरु आहे. त्यामुळे परिसरातील विद्युत पुरवठा लवकरात-लवकर सुरळीत करून द्यावा अशी मागणी नागरिकांनी महावितरणकडे मागणी केली आहे.

विद्युत उपकरणे जळण्याची शक्यता ः
विजेचा लपंडाव सुरु असल्याने वीज पुरवठा कमी दाबाने होत आहे. त्यामुळे घरातील विद्युत उपकरणे बिघडण्याची धोका उद्‍भवत आहे. या परिसरातील अनेक आयटी क्षेत्रातील कर्मचारी घरातून काम करत असतात. त्यांना विद्युत पुरवठा खंडित असल्यामुळे त्यांचा कामामध्ये अडथळा निर्माण होत आहे. त्याचप्रमाणे उपकरणे बिघडल्यास, जळाल्यास याची भरपाई कोण करणार असा प्रश्‍न उपस्थित केला आहे. वारंवार होणाऱ्या विजेच्या लपंडावामुळे रहिवासी त्रस्त झाले आहेत.

गेल्या दोन-तीन दिवसांपासून विजेच्या समस्येने नागरिक हैराण झाले आहेत. त्यातच महावितरणच्या अधिकाऱ्यांना तक्रार करून देखील समस्या सोडवली जात नसल्याचे नागरिकांनी सांगितले. पिंपळे सौदागर परिसरात रस्ते आणि पायाभूत सुविधा महापालिकेने दिल्या आहेत. अद्याप त्यावरती ठोस उपाययोजना होताना दिसत नाहीत. त्यामुळे महावितरण विरोधात नाराजी व्यक्त केली जात आहे. सूर आहे.

विजेच्या समस्येबाबत अधिकाऱ्यांना तक्रारीची दखल घेण्याबाबत सूचना केल्या आहेत. त्याचा आढावा घेण्यात येत आहे. संबंधित परिसरात म्हणजेच, आकुर्डी, चिंचवड, पिंपरी, पिंपळे सौदागर, रहाटणी येथे कोणताही तक्रारी नोंद नाही. तरी या ठिकाणची पाहणी करून समस्येवर उपाययोजना करण्यात येईल.
- सोमनाथ मुंडे, कार्यकारी अभियंता, पिंपरी विभाग

‘‘आकुर्डी भागात काल दुपारी साडे तीन वाजता विद्युत पुरवठा खंडित झाला होता त्यानंतर रात्री साडे आठ वाजता सुरळीत झाला. मात्र, दिवसभरातून दोन-तीन वेळी विद्युत पुरवठा खंडित होत आहे. तसेच, गुरुदेवनगर आकुर्डी, आणि विठ्ठलवाडी भागातही हीच स्थिती आहे. महावितरण विभागाने त्वरित उपाययोजना कराव्यात’’
-प्रकाश परदेशी, आकुर्डी