काळेवाडी, ता. २५ : आकुर्डी रेल्वे स्टेशन ते हडपसर, तसेच वारजे माळवाडी मार्गावरील पीएमपीएमएल बस बंद झाल्याने गैरसोय होत आहे. या बससेवा पुन्हा सुरू करण्याची मागणी प्रवासी करत आहेत.
आकुर्डी रेल्वे स्टेशन ते हडपसर बस क्रमांक ३२२ ही बस अनेक वर्षे सुरू होती. त्यामुळे चिंचवड, काळेवाडी, रहाटणी, पिंपळेगुरव, विद्यापीठ व पुढे मंडई, स्वारगेट तसेच इतर ठिकाणी जाणे सोयीस्कर होत होते. परंतु दोन वर्षांपूर्वी ही बस अचानक बंद करून आकुर्डी रेल्वे स्टेशन ते मनपा नदीकाठी असा मार्गक्रम नेमून देण्यात आला.
आता रहाटणी व काळेवाडी तसेच अंतर्गत भागांतील प्रवाशांना चिंचवडगाव किंवा काळेवाडी फाटा येथे लांब पायी किंवा रिक्षाने जावे लागत आहे. त्यामुळे वेळ, पैसे अधिक लागत आहेत. या मार्गातील बस मनपाहून जात असल्याने परवडत नसल्याचे प्रवाशांचे म्हणणे आहे.
काळेवाडी, रहाटणी तसेच पिंपळे सौदागर या भागांतील प्रवासी हे हडपसर, स्वारगेट व पुण्यातील मुख्य परिसरात नोकरी व व्यवसायासाठी व खरेदीसाठी जातात. परंतु या मार्गावरील बस सेवा बंद झाल्याने अडचणीचे होत आहे. प्रशासनाने आकुर्डी रेल्वे स्टेशन ते पुणे स्टेशन, आकुर्डी रेल्वे स्टेशन ते चंदन नगर या मार्गावरही बस सुरू करावी, अशी मागणी होत आहे.

आकुर्डी स्टेशन ते हडपसर, वारजे माळवाडी बस वाहतूक ही टप्प्याने सुरू करण्याचा विचार करू. लांब पल्ल्यांमध्ये प्रवासी मिळत नसल्याचे यापूर्वी बघण्यात आले व हा मार्ग अनेक वर्षांपूर्वी बंद केला आहे. नागरिकांची तशी मागणी असल्यास वरिष्ठांशी चर्चा करू.
- अशोक साबळे, निगडी बस डेपो प्रमुख, पीएमपीएमएल

आकुर्डी-हडपसर बस बंद झाल्याने मला कंपनीत जाणे अडचणीचे झाले आहे. कधी दुचाकी किंवा कधी टप्प्याने बस प्रवास करावा लागतो. त्यामुळे खर्च वाढला आहे.
- नाथराव जाधव, प्रवासी, काळेवाडी

मी हडपसर येथील कंपनीत काम करते. काळेवाडीतून थेट बस नाही. मला पिंपळे गुरव किंवा काळेवाडी फाटा येथून बसने जावे लागते. त्यामुळे प्रवासाचा त्रास होऊन वेळेचाही अपव्यय होतो.
- सुनीता जाधव, प्रवासी, रहाटणी