तळेगाव दाभाडे, ता.२३ : कासारसाई (कुसगाव) धरणामध्ये बुडून एका तरूणाचा मृत्यू झाला. मंगळवारी पाण्यातून त्याचा मृतदेह बाहेर काढण्यात शोध पथकाला यश आले.
माधव हरगौरी सिंग (वय १७, रा. सातपूर, आंबडलिंक रोड, ता.अंबड, जि. नाशिक) असे मृत तरूणाचे नाव आहे. 
नाशिक येथून हिंजवडी येथे परीक्षेसाठी आला होता. परीक्षा झाल्यानंतर आतेभाऊ याच्याबरोबर मित्राच्या सांगण्यावरून तो कासारसाई (कुसगाव) धरणावर बोटिंग करण्यासाठी व धरण पाहण्यासाठी आला होता. त्यावेळी, माधव हरगौरी सिंग हा पाण्यात उतरला. पाण्याच्या खोलीचा अंदाज न आल्याने तो सोमवारी पाण्यात बुडाला. शिरगाव पोलिस ठाण्याचे पोलिस उपनिरीक्षक  अजय लोहेकर आणि  अन्य पोलिस कर्मचाऱ्यांनी घटनास्थळी भेट दिली. सोमवारी सायंकाळी वन्यजीव रक्षक मावळ संस्था, शिवदुर्ग मित्र लोणावळा, आपदा मित्र मावळ, आपदा मित्र (चाकण) या स्वयंसेवी संस्थेचे कार्यकर्ते  नीलेश गराडे, अनिल आंद्रे, विनय सावंत, शुभम काकडे, अवी कारले, प्रथमेश सुपेकर, रमेश कुंभार, वैभव वाघ, गणेश गायकवाड, आशिष बोडके यांनी माधव याला शोधण्याचे प्रयत्न केले. मात्र, अंधार झाल्यानंतर शोधकार्य थांबवावे लागले होते.