तळेगाव दाभाडे, ता. ३० ः राष्ट्रवादी काँग्रेसच्या तळेगाव दाभाडे येथील सामाजिक न्याय विभागाचे जिल्हाध्यक्ष सुहास गरुड यांच्या घराच्या प्रवेशद्वारासमोर हळद-कुंकू लावलेले लिंबू आढळले. मंगळवारी (ता. २९) रात्री दहाच्या सुमारास हा प्रकार घडल्याचे सीसीटीव्ही कॅमेऱ्यात कैद झाले. त्यात एक वयस्कर महिला लिंबू फेकून जाताना दिसते. याप्रकरणी गरुड यांनी तळेगाव दाभाडे पोलिस ठाण्यात बुधवारी निवेदन दिले.
गरुड यांनी तळेगाव दाभाडे येथील इनाम वर्ग ६ ब संदर्भात काही जुने खटले पुन्हा सुरू करण्याचा प्रयत्न केला आहे. त्यातून हा घडला आहे. त्यामुळे संबंधित महिलेवर जादूटोणाविरोधी कायदा व ॲट्रॉसिटी अंतर्गत गुन्हे दाखल करण्याची मागणी त्यांनी केली.
---------