तळेगाव दाभाडे, ता. ८ ः तळेगाव दाभाडे येथे बनावट कागदपत्रे तयार करून तसेच खोटे नाव वापरून एका महिलेची जमीन बेकायदेशीरपणे विकून तिची फसवणूक करण्यात आली. ही घटना एक डिसेंबर २०२२ ते ३१ डिसेंबर २०२३ दरम्यान घडली. याबाबत महिलेने तळेगाव दाभाडे पोलिस ठाण्यात सहा ऑगस्ट २०२५ रोजी फिर्याद दिली. त्यानुसार समीर काजळे (चिखलसे, कामशेत, ता. मावळ), देवानंद उपाध्याय (पुनावळे, ता. हवेली)आणि दोन अज्ञातांच्या विरोधात गुन्हा दाखल करण्यात आला आहे. पोलिसांनी दिलेल्या माहितीनुसार, अनोळखी व्यक्तींनी फिर्यादी आणि तिच्या भावाच्या खोट्या नावाने (वर्षा सुनील पुराणिक), (आशुतोष विवेक क्षीरसागर) बनावट आधार कार्ड, पॅन कार्ड तलाठी कार्यालयात जमा करून वारस नोंदणी केली. त्यानंतर आरोपी काजळे आणि उपाध्याय यांना जमीन विकून फसवणूक केली. पोलिस पुढील तपास करत आहेत.